Во одговорот до пратеничката Костадиновска-Стојчевска, министерката додаде оти е свесна дека законот за високо образование предизвикал одредени реакции за кои, како што додаде, не може да се каже дека се генерализирани и дека доаѓаат од мнозинството заинтересирани, а тоа се студентите и универзитетскиот наставно-научен кадар
Министерката за образование и наука Весна Јаневска денеска од собраниската говорница рече дека нема да се повлече предлог-законот за високо образование оти тој е за доброто на сите. Ова таа го кажа одговарајќи на прашање од пратеничката од Социјалдемократскиот сојуз (СДСМ), Бисера Костадиновска-Стојчевска, која предупреди дека предложените решенија можат да ја нарушат универзитетската автономија и да воведат поголема државна контрола врз високото образование.
На крајот од излагањето пратеничката упати директно прашање до министерката дали овој предлог-закон ќе се повлече и дали ќе пристапат кон изработка на ново решение.
„Нема да го повлечеме законот. Ќе ви објаснам дека е за доброто на сите“,
рече Јаневска додавајќи дека за него сè уште се водат јавни расправи на сите универзитети.
Посочи дека предлог-законот е на ЕНЕР, каде што сите засегнати страни можат да остават забелешки.
Исто така, Јаневска додаде оти е свесна дека законот за високо образование предизвикал одредени реакции за кои, како што додаде, не може да се каже дека се генерализирани и дека доаѓаат од мнозинството заинтересирани, а тоа се студентите и универзитетскиот наставно-научен кадар.
„Имам прочитано некои од забелешките“,
кажа министерката и посочи дека излагањето на пратеничката е полно со флоскули од оние што пишуваат негативно за законот.
Законот, како што вели Јаневска, е граден по сите европски и светски стандарди, во насока дека ги подобрува правата на студентите за кои се предвидува две години мандат во сите тела на универзитетите и им се дава предност на најдобрите студенти, како оние што ќе се вратат од завршени студии од стоте најдобри универзитети во светот, оние што се добитници на „Инженерски прстен“ и на десетте најдобри студенти на универзитетите.
Според неа, одредена е и сума за демонстрантите, која смета дека е достојна за нивната работа и се предвидува вработување на студенти на проекти.
„Го слушнав и пресот на вашиот претседател и ќе кажам дека или го излажале или вие не сте го читале добро законот зашто наведениот член 13 зборува за автономија, за чување на автономијата, а не за мешање на државата“,
рече таа.
Во неговата изработка додаде дека учествувале над шеесетина професори и ќе се одржат серија расправи за него.
Пратеничката Костадиновска-Стојчевска на денешната собраниска седница наменета за прашања од опозицијата упати прашање до министерката Јаневска, кое се однесуваше на предлог-законот за високо образование и последиците од неговите решенија врз автономијата на универзитетите, квалитетот на образованието и можностите за развој на студентите и академскиот кадар.
Таа се осврна и на реакциите од академската заедница кои предупредуваат дека законот премногу ја централизира контролата, а не ги решава суштинските проблеми, како финансии, одлив на млади кадри и слабата поврзаност со пазарот на труд.
Во продолжение прочита неколку забелешки за овој предлог-закон.
На крајот од излагањето упати директно прашање до Јаневска дали ова законско решение ќе биде повлечено и ќе пристапат кон изработка на нов предлог-закон.