Според опозицијата, нема борба против криминалот и корупцијата, туку има обиди за заштита на криминалците од врвот на власта
Опозицискиот Социјалдемократски сојуз (СДСМ) денеска обвини дека во Македонија цвета корупцијата, па затоа земјата е на ниво на Буркина Фацо и Танзанија, повикувајќи се на ранг-листата според Глобалниот индекс за перцепција на корупцијата за 2025 година објавена од „Транспаренси интернешнл“.
„Граѓаните секој ден гледаат дека во Македонија цвета корупцијата поради криминалот на тендер-коалицијата ВМРО-ЗНАМ. 161 тендер за една фирма, 51 тендер за омилената фирма на ВМРО преку општините, 9 милиони евра за фирма само со двајца вработени, 1,2 милион евра за фирма блиска до ЗНАМ преку ‘Пошта‘. Пет тони дрога преку граница, се случи најголемиот наркоскандал во регионот со дрога од Македонија која била шверцувана во Србија“,
се вели во соопштението од СДСМ.
Оттаму велат дека наместо реформи во правосудството, власта презема целосна контрола врз судството и Обвинителството и носи закони што не се согласно препораките на Европската Унија.
Според опозицијата, нема борба против криминалот и корупцијата, туку има обиди за заштита на криминалците од врвот на власта.
„Македонија го има својот Мадуро кој ја води земјата кон намерна изолација од ЕУ за да може слободно да се спроведува грабежот на грбот на граѓаните“,
велат од опозициската партија.
Северна Македонија се најде на 84. место од вкупно 180 земји на ранг-листата според Глобалниот индекс за перцепција на корупцијата за 2025 година објавена од „Транспаренси интернешнл“.
Во однос на 2024 година, кога беше рангирана на 88. место, земјава напреднала за четири позиции, но и натаму нема промена во индексните поени на скалата на која 0 поени значат најлош, а 100 поени најдобар можен резултат според индексот за перцепција на корупцијата. Во 2025 година, исто како и годината пред неа, земјава има резултат од 40 индексни поени, што е за три под глобалниот просек од 43 бода.
Осумдесет и четвртото место на ранг-листата според Глобалниот индекс за перцепција на корупцијата за 2025 година земјава го дели со соседна Бугарија, Унгарија, Буркина Фасо, Куба, Гвајана и Танзанија.