Мицкоски рече дека со оваа набавка ќе се реши еден од најголемите проблеми во функционирањето на „Комунална хигиена“, а тоа е застарената, неодржувана и истрошена механизација
Премиерот Христијан Мицкоски денеска изјави дека ќе се набават вкупно 40 нови возила за потребите на ЈП „Комунална хигиена“. Набавката ќе биде преку Министерството за транспорт во соработка со Светска банка.
Мицкоски рече дека со оваа набавка ќе се реши еден од најголемите проблеми во функционирањето на „Комунална хигиена“, а тоа е застарената, неодржувана и истрошена механизација.
Тој дополни дека состојбата во претпријатието дополнително ја усложнува превработеноста, како и недоволната ефикасност на дел од вработените.
„Со овие 40 камиони сигурен сум дека многу ќе се подобри состојбата со хигиената во Скопје. Како што најавивме и во кампањата, и како што најави и самиот градоначалник, хигиената ни е прв приоритет и во таа насока се движи овој процес“,
рече Мицкоски.
Премиерот очекува набавката да заврши до крајот на претстојната пролет, а испораката на возилата да почне до крајот на годината.
„Сѐ што било закочено, не било сработено и не се работело, украдено, уништено, се трудиме да го оживееме и да го вратиме повторно во функција. Не може преку ноќ. Да бидеме трпеливи“,
рече Мицкоски.