„При отстранување на една ѕидна керамичка плочка (во семејниот дом на судијата во Неготино н.з.), забележана е дупка во која се наоѓале алуминиумски ролни во форма на цилиндар, спакувани во поединечни 13 пакувања, во кои пронајдени се вкупно 610 банкноти во апоени од по 500 евра и 225 банкноти во апоени од по 200 евра, или вкупно 350 000 евра“, велат од Министерството за внатрешни работи
Министерството за внатрешни работи (МВР) попладнево соопшти дека поднело кривична пријава против судијата на Апелацискиот суд Скопје, Ѓоко Ристов, и сподели детали од претресот во неговиот семеен дом во Неготино, каде што викендот истражните органи пронајдоа 350 000 евра соѕидани во простор од ѕид.
Во соопштението на МВР идентитетот на осомничениот судија е наведен со иницијали, но од содржината и контекстот повеќе од извесно е дека станува збор за апелацискиот судија Ристов.
„На 20.01.2026 Единицата за корупција во Одделот за сузбивање организиран и сериозен криминал до Основниот јавно обвинителство за гонење организиран криминал и корупција (ОЈО ГОКК) поднесе кривична пријава против Ѓ.Р. (53) од Неготино, со живеалиште во Скопје, поради постоење на основано сомнение за сторени кривични дела противправно стекнување и прикривање имот по чл.359-а став 3 во врска со став1 и перење пари и други приноси од казниво дело по член 273 став 1 од Кривичниот законик (КЗ)“,
се наведува во соопштението од МВР.
Во него, исто така, се наведува дека осомничениот во својство на службено лице – судија во Апелацискиот суд Скопје; во временски период од 10 февруари 2020 година до денес – спротивно на законската должност за пријавување имотна состојба или нејзина промена, дал лажни податоци за својот имот и имотот на неговото семејство, кој, како што наведуваат од МВР, во големи размери ги надминува неговите законски приходи.
Што се однесува до деталите од извршениот претрес во домот на неговите родители во Неготино, од Министерството за внатрешни работи наведуваат дека истражните тимови забележале сомнителна околност во врска со изведени градежни работи, односно корекција на ѕидните плочки во кујната на првиот кат од куќата.
„По што, при отстранување на една ѕидна керамичка плочка, забележана е дупка во која се наоѓале алуминиумски ролни во форма на цилиндар, спакувани во поединечни 13 пакувања, во кои пронајдени се вкупно 610 банкноти во апоени од по 500 евра и 225 банкноти во апоени од по 200 евра, или вкупно 350 000 евра“,
се вели во соопштението од МВР.
Соопштението од МВР дојде речиси истовремено откако Судскиот совет со мнозинство гласови одлучи по барањето на Основниот кривичен суд Скопје и му го одзеде имунитетот на судијата Ристов и одобри нему да му биде одредена мерка куќен притвор.
Покрај овие две одлуки, Судскиот совет одлучи и судијата времено да биде оддалечен од вршењето на судиската функција, до правосилно завршување на кривичната постапка.
За одземање на имунитетот на судијата Ристов и одобрувањето на одлуката тој да оди во куќен притвор, „за“ гласаа сите десет присутни члена на Судскиот совет на седницата.
Претходно денеска од Основното јавно обвинителство за гонење на организираниот криминал и корупцијата информираа дека освен мерка куќен притвор е предложено на апелацискиот судија Ристов да му биде определена и мерка на претпазливост, односно привремено одземање на пасошот или друга исправа за преминување на државната граница.
Инаку, од Основното јавно обвинителство за гонење на организиран криминал и корупција (ОЈО ГОКК) во неделата соопштија дека сомнежите се дека пронајдените пари се незаконски стекнати, а постапката која резултираше со претресот во домот на Ристов е проширување на истрагата иницирана на 14 декември, кога беше осомничен адвокатот и поранешен државен правобранител Фехми Стафа за кривичното дело примање награда за противзаконито влијание.
„Станува збор за една од најопсежните истраги поради сомненија за висока корупција во нашата држава досега, која е поткрепена со информации и известувања од Агенцијата за национална безбедност (АНБ)“,
соопштија од ОЈО ГОКК во неделата.
Поранешниот државен правобранител Стафа беше уапсен на 13 декември минатата година, во рамките на постапка што против него ја поведе Основното јавно обвинителство за гонење организиран криминал и корупција (ОЈО ГОКК), поради основано сомнение дека сторил кривично дело примање награда за противзаконито влијание.
Како што информираа тогаш од Обвинителството, во периодот од октомври до 13 декември, осомничениот Стафа примил вкупно 50 000 евра за да посредува и да влијае кај судија во Апелацискиот суд Скопје во врска со предмет што се водел против негов клиент, односно лице што го застапувал како адвокат. Намерата, според ОЈО ГОКК, била преку поткуп да се влијае врз извршување службено дејствие кое не смеело да биде преземено.
Непосредно по примањето на парите, осомничениот Стафа беше лишен од слобода, при што кај него беа пронајдени и одземени паричните средства. Инаку, лицето за кое поранешниот државен правобранител требало да издејствува укинување мерка притвор е осомничениот во случајот „Синџир“, Љупчо Пецов, познат по прекарот Ѓаволот.