Од одлуката на Судскиот совет зависи дали на апелацискиот судија осомничен за противправно стекнување и прикривање имот и перење пари ќе му биде определен куќен притвор, како што денеска побара Обвинителството
Судскиот совет за попладнево во 15:30 часот закажа итна седница со единствена точка на предлог-дневниот ред – расправа и одлучување по барањето на Основниот кривичен суд Скопје за одземање на имунитетот на судијата Ѓоко Ристов и одобрување на предлогот за определување мерка куќен притвор.
Од одлуката на Судскиот совет за имунитетниот статус на Ристов зависи дали на судијата осомничен за противправно стекнување и прикривање имот и перење пари ќе му биде определен куќен притвор, како што денеска побара Основното јавно обвинителство за гонење организиран криминал и корупција (ОЈО ГОКК).
Од Основниот кривичен суд Скопје попладнево потврдија дека го добиле предлогот на Обвинителството со кој се бара на осомничениот судија да му бидат определени куќен притвор и мерки на претпазливост и дека за тоа го известиле Судскиот совет од каде што очекуваат одговор.
Според Законот за судовите, судија не може да биде притворен без одобрување на Судскиот совет освен ако е затечен во вршење на кривично дело за кое е пропишана казна затвор во траење од пет години. Судскиот совет, со најмалку седум гласа од вкупниот број членови со право на глас (тринаесет членови), дава согласност по барањето за одобрување притвор на судија и му го одзема имунитетот.
Во рамки на обемна истрага на ОЈО ГОКК, викендов во домот на родителите на скопскиот апелациски судија Ѓоко Ристов, во Неготино, при претрес беа пронајдени 350 000 евра соѕидани во простор од ѕид.