Во Охридско, на реката Сушица со багер е подигнат заштитен насип, со што е спречено понатамошното излевање, но според ЦУК сè уште има поплавени подруми и дворови на повеќе локации. Во селата Мислешево и Калишта во Струшко, исто така, има поплавени подруми, дворови и земјоделски површини, поради што се преземаат дополнителни мерки за санација на последиците и заштита на населението
По обилните врнежи од дожд и наместа од снег што изминатите денови ја зафатија државата, состојбата полека се смирува, но, според последните информации од Центарот за управување со кризи (ЦУК), и понатаму има поплавени домови, земјоделски површини и одрони на дел од патните правци, особено во западниот дел од државата.
Како што информираа утрово од ЦУК, во Пелагонискиот Регион, поточно на подрачјата на Битола, Могила и Новаци, каде што имаше излевање на реките, водата постепено се повлекува, а слична е состојбата и во Демир Хисар, каде реките се вратени во своите корита. Исклучок во Демирхисарско е ситуацијата со реката Црна во атарот на селата Жван и Единаковци, каде, според податоците на Центарот заклучно со 8 часот утрово, сè уште има излевање и поплавени се поголеми земјоделски површини. Поради оштетување на мостот на Боишка Река, локалниот пат кон селото Мренога е затворен за сообраќај.
Поплавени земјоделски површини како последица на поројните врнежи има и на подрачјето на Ресен, но водата постепено се повлекува. Во текот на вчерашниот ден во овој регион е интервенирано со една градежна машина за расчистување на коритото на Голема Река.
Во Охридско, на реката Сушица со багер е подигнат заштитен насип, со што е спречено понатамошното излевање, но, според ЦУК, сè уште има поплавени подруми и дворови на повеќе локации. Во селата Мислешево и Калишта во Струшко, исто така, има поплавени подруми, дворови и земјоделски површини, поради што се преземаат дополнителни мерки за санација на последиците и заштита на населението.
Процесот на санација е отежнат кај селото Мислешево поради неможноста да се изведе пропуст за истек на водата.
Според ЦУК, во Дебарско, реката Радика има зголемен водостој, но засега нема опасност од излевање. Патните правци се проодни, а помали одрони се регистрирани на делниците меѓу Жировница и Дебар и Дебар – Струга, кои редовно се расчистуваат.
Во Кичевско, водостоите на Зајашка Река и реката Треска се намалени и нема опасност од нови излевања, а во тек е расчистување, дезинфекција и создавање минимални услови во домовите на жители на улицата „Прилепска“ во градот. Поради поплавување на нивните живеалишта, стотина лица беа евакуирани и сместени во спортската сала „Христо Узунов“, каде што им е обезбедена неопходна грижа.
Во Вардарскиот Регион, конкретно на ридско-планинските подрачја во регионот на Кавадарци со механизација е интервенирано на патните правци Кавадарци – Мушов Гроб – Мрежичко, Мушов Гроб – Михајлово и Страгово – Горна Бошава, каде снежната покривка изнесува до 15 сантиметри.
Поради снежни наноси, како што информираат од ЦУК, непрооден за сообраќај е патниот правец меѓу селата П’клиште и Герман. Таму има наноси од кашест снег, што го отежнува сообраќајот и во тек е негово расчистување.
Во Полошкиот Регион, каде што имаше паднато голема карпа на коловозот меѓу Тетово и селото Бањиче, патот е расчистен и сообраќајот е нормализиран.
Во меѓувреме, во Гостиварско, на патниот правец кон Маврово, кај каменоломот, е регистриран одрон, поради што се преземаат мерки за негово расчистување.