Во известувањето на сообраќајното претпријатие, објавено на фејсбук-профилот на Град Скопје, се наведува дека поради евентуалната непроодност на улиците, дел од линиите ќе сообраќаат до локации кои ќе бидат оценети како безбедни и проодни за автобусите на ЈСП „Скопје“, согласно проценките на надлежните служби
Јавното сообраќајно претпријатие (ЈСП) „Скопје“ најавува можно привремено редуцирање на одредени автобуски линии поради ниските температури и најавите за можни врнежи од снег кои ќе го зафатат Скопје и околината.
Во известувањето на сообраќајното претпријатие, објавено на фејсбук-профилот на Град Скопје, се наведува дека поради евентуалната непроодност на улиците, дел од линиите ќе сообраќаат до локации кои ќе бидат оценети како безбедни и проодни за автобусите на ЈСП „Скопје“, согласно проценките на надлежните служби.
„Доколку не постојат услови за безбедно одвивање на сообраќајот, ЈСП ‘Скопје’ ќе биде приморано да изврши дополнителни измени, за што јавноста ќе биде навремено информирана. Во услови на стабилно време, јавниот превоз ќе се одвива според редуцираниот делничен зимски возен ред, кој важи до завршувањето на зимскиот училиштен распуст“,
се наведува во известувањето.
Се посочува и дека екипи на ЈСП, заедно со службите на Град Скопје и општините, со соодветна механизација ќе бидат на терен за навремено и ефикасно обезбедување на безбедноста на учесниците во сообраќајот со цел превентивно дејствување и создавање услови за непречено функционирање на јавниот превоз.
Инаку, според најавите на УХМР, денеска попладне во Скопје ќе има повремени врнежи од дожд и снег кои потоа во текот на ноќта ќе бидат само од снег. Снежни врнежи се најавуваат и за утре.