Станува збор за пресудата на Управниот суд донесена на 15 мај годинава, со која беше поништена одлуката на Собранието од 10 април 2023 година за избор на Елизабета Дуковска за судијка во Уставниот суд
Седницата на Судскиот совет што требаше да се одржи на 24 декември, но беше одложена поради немање кворум, а на која, меѓу другото, треба да се расправа и за пресудата на Управниот суд со која судијката Елизабета Дуковска станата првата „одјавена“ уставна судијка, ќе се одржи на 12 јануари следната година.
За новиот термин за одржување на 534. седница Судскиот совет информира денеска преку кусо соопштение, објавено на неговата официјална веб-страница.
„Судскиот совет на Република Северна Македонија известува дека 534. седница со предложениот дневен ред од 24.12.2025 година, ќе се одржи на ден 12.01.2026 година со почеток во 10 часот“,
се наведува во соопштението.
На седницата членовите на Судскиот совет треба да расправаат за престанок на судиска функција поради исполнување услови за старосна пензија, потоа по претставки и поплаки поднесени од граѓаните и правните лица за работата на судиите, претседателите на судовите и судовите. На дневен ред на оваа седница е и пресудата на Управниот суд У-5 бр.380/2025, а шеста точка е „расправа по известувања за утврдена фактичка состојба и одлучување по нив“.
Сепак, во фокусот на јавноста е пресудата на Управниот суд донесена на 15 мај годинава, со која беше поништена одлуката на Собранието од 10 април 2023 година за избор на Елизабета Дуковска за судијка во Уставниот суд.
За потсетување, Дуковска беше избрана за уставна судијка од Собранието, како предлог на Судскиот совет. Шест месеци подоцна стигна тужба до Управниот суд од судијката Антоанета Димовска. Таа се жалеше дека кога Судскиот совет ја утврди Дуковска како предлог за уставен судија, инаку со 11 гласа „за“ од можни 13, не се изјаснил и за другите двајца кандидати, меѓу кои и Димовска.
Дуковска повеќе од половина година не е уставна судијка, туку е делителка на правда во Апелацискиот суд Скопје, од каде што дојде.
Нејзиниот случај сè уште ја бранува јавноста, делумно и поради сомнежот дека пресудата е пишувана „однадвор“.
Во гостување во емисијата „360 степени“, на 9 јуни годинава, Дуковска даде објаснување и зошто се сомнева дека пресудата е пишувана во АКМИС-системот.
„Во АКМИС-системот пресуда кога се куца… Најгоре на образецот, бидејќи е пресуда, секогаш стои во името на граѓаните на Северна Македонија. Оваа пресуда не содржи такво нешто, заради што судиите веднаш донеле решение за исправка“,
кажа тогаш Дуковска.
За судијката е спорно и тоа што во пресудата на Управниот суд не се спори актот на Собранието, кое ја изгласа, туку го проблематизира начинот на кој Судскиот совет ја утврдил за кандидатка.
Тоа уште летоска отвори повеќе дилеми, на пример – како сега Судскиот совет ќе бира кандидат за испразнетото место во Уставен?
Претседателот на Судскиот совет, Александар Камбовски, во досегашните јавни настапи зборуваше дека е оптимист оти до крајот на оваа година ќе се реши прашањето со празното столче во Уставен, откако судијката Дуковска беше принудена да замине. Сепак, седницата што требаше да се одржи на 24 декември, а на која на дневен ред беше и пресудата на Управниот суд за Дуковска, се одложи бидејќи во салата за седници на Судскиот совет беа присутни само шестмина од неговите членови.
Претсадателот на Советот, Александар Камбовски, и неговите колеги Аритон Ала, Ивица Николовски, Данка Ристова, Ханиф Зендели и Џенета Бектовиќ беа во салата, додека отсутни беа членовите Исамедин Лимани, Тања Чачарова-Илиевска, Весна Дамева, Павлина Црвенковска и Антоанета Димовска.
Дел од нив, како што кажа Камбовски тогаш, користеле годишен одмор, а дел биле на боледување.
Во однос на барањето на судијката Дуковска за Судскиот совет да ја прогласи пресудата како неподобна за извршување и за тоа да ги извести Управниот суд, Собранието и неа, Камбовски во изјава за „360 степени“ рече дека писменото барање ќе биде повторно разгледано на работен состанок, по што Судскиот совет ќе може да се произнесе.
Барањето случајот да се расчисти до крај се чини дека за Дуковска не е толку заради функцијата колку што е прашање на принцип.
На прашање на „360 степени“ во случај да се оди со повторување на постапката за неа, дали повторно би ја изоделе цела таа постапка или втората варијанта, доколку се распише нов јавен повик, дали би се кандидирале повторно – таа рече дека засега не може да каже.
Седницата на Судскиот совет на 12 јануари ќе биде прва во новата година и прва откако завчера (29 декември 2025 г.) Собранието со „73“ гласа „за“ и еден „воздржан го донесе новиот Закон за Судски совет, чија главна цел е да се отстранат досега утврдените слабости во постојната правна рамка и да се обезбеди пофункционално, транспарентно и отчетно тело, задолжено за избор и разрешување на судиите и претседателите на судовите и оценување на нивната работа.
Инаку, Судскиот совет го чека од Собранието изборот на тројца нови членови, од кои двајца треба да бидат предложени од претседателката на државата, Гордана Сиљановска-Давкова.
Таа во вчерашното новогодишно интервју за првиот канал на Македонската телевизија кажа дека за нови членови на Судскиот совет ќе предложи две жени реформаторки, од кои едната е професорка, а другата адвокатка. Двете, како што кажа претседателката, имаат огромен углед во општеството, но не сакаше да ги објави имињата и најави дека ќе го стори тоа пред да стигне предлогот во Собранието.
Што се однесува до испразнетото место во Уставниот суд по случајот со Дуковска, претседателот на Судот, Дарко Костадиновски, на прес-конференција во петокот го повика Судскиот совет итно да предложи кандидат за уставен судија. Тој упати повик и до Собранието да избере уставни судии, а политичарите да покажат повисоко ниво на уставно-правна култура и да се воздржат од етикети и поделби, со што ќе покажат реална, а не декларативна посветеност на владеењето на правото.
Одговарајќи на новинарско прашање дали се сомнева на политичка позадина во врска со одлуката на Управниот суд за судијката Елизабета Дуковска, која беше и судија известител за предметот за Законот за јазиците, Костадиновски кажа дека тоа што Управен ја донел пресудата две години по нејзиниот избор отвора простор за сомнеж.
„Оваа одлука Управниот суд да ја донесеше во рок од три, седум, 15 или 30 дена по изборот, никој немаше да зборува ништо. Но, по две години, природно е да се сомневаме. Здравата логика налага да имаме основ да се сомневаме“,
изјави претседателот на Уставниот суд.