На отворањето на новата лабораторија денеска присуствуваа премиерот Христијан Мицкоски, министерот за здравство Азир Алиу и директорот на Фондот за здравствено осигурување Сашо Клековски
Микробиолошка лабораторија со капацитет за вршење над 20.000 анализи годишно, отвори денеска фабриката „Алкалоид“ АД Скопје. Генералниот директор Живко Мукаетов рече дека станува збор за инвестиција вредна 3,1 милион евра.
На отворањето присуствуваа и премиерот Христијан Мицкоски, министерот за здравство Азир Алиу и директорот на Фондот за здравствено осигурување Сашо Клековски.
„Можевме да видиме нешто што го има во најсовремените светски фармацевтски компании и горди сме што ова е македонско. Повеќе од 3.000 вработени ја градат својата иднина тука и во претставништвата на „Алкалоид“, а најголемиот дел од портофолиото на оваа компанија или над две третини, е извозно, што влијае врз зголемувањето на БДП и индустриското производство“,
изјави Мицкоски.
Тој рече дека Владата секогаш ќе поддржува успешни приказни како „Алкалоид“.
Мукаетов рече дека оваа нова лабораторија ќе го прошири портфолиото на лекови што ќе овозможи „Алкалоид“ да биде уште поконкурентна, не само во регионот, туку и во светот.
„Горди сме на новата инвестиција што ќе ни овозможи да станеме уште поконкурентни, но и Македонија како држава. Со ова ги шириме капацитетите на микробиолошките анализи на суровини, полупроизводи и готови производи. Горди сме што комапнијата продолжува со инвестицискиот циклус“,
изјави тој.
Според него, компанијата ја затвора 2025 година многу успешно.
„Ја завршуваме годината над планираното, со вкупни приходи од над 335 милиони евра и со рекорден консолидиран износ од над 220 милинои евра“,
информираше генералниот директор на „Алкалоид“, Живко Мукаетов.