Појаснувањето од кабинетот на Гаши доаѓа како одговор на новинарски прашања и писмото упатено од родителите на тешко повредената 13-годишна А. Т. во сообраќајната несреќа во која учествуваше пратеникот Сашко Јанчев од Левица
Собранието не може самоиницијативно да поведе постапка за одземање на пратенички имунитет, ниту, пак, може тоа да го стори врз основа на барања од поединци, организации или медиуми, велат од кабинетот на претседателот на Собранието, Африм Гаши.
Појаснувањето од кабинетот на Гаши доаѓа како одговор на новинарски прашања и писмото упатено од родителите на тешко повредената 13-годишна А. Т. во сообраќајната несреќа во која учествуваше пратеникот Сашко Јанчев од Левица.
Согласно Уставот и Деловникот, постапка за одземање имунитет може да биде иницирана исклучиво врз основа на официјално барање поднесено од надлежен државен орган. Ова се однесува на случаи кога се бара поведување кривична постапка, определување мерка притвор или извршување казна затвор кон пратеник.
„Доколку од надлежните органи биде доставено официјално барање за постапување, Собранието ќе постапи во рамките на утврдените уставни и деловнички обврски“,
наведуваат од кабинетот на претседателот Гаши.
Иако не може да ја иницира постапката, претседателот Гаши, во согласност со начелата на транспарентност и целосно информирање, го проследил барањето на родителите до Комисијата за деловнички и мандатно-имунитетни прашања, како и до самиот пратеник Сашко Јанчев.
Несреќата се случи на 14 септември 2025 година во селото Марино, Општина Илинден, во која учествуваше пратеникот Јанчев управувајќи возило „хјундаи тусон“.
Во несреќата беа повредени возачот на мопед, 16-годишниот М. Д., и 13-годишната сопатничка А. Т. Малолетникот М. Д. почина на 9 октомври од здобиените повреди.
Родителите на А. Т. пред два дена испратија писмо до Собранието барајќи одземање на имунитетот на Јанчев.
Во писмото родителите на тешко повреденото девојче, меѓу другото, наведуваат дека имаат сериозна загриженост за влијание врз судскиот процес, бидејќи сѐ уште не е покренато обвинението за овој трагичен настан.
Тие изразуваат сомнеж дека пратеникот може да ја злоупотреби својата функција и да се повика на пратеничкиот имунитет, со што, како што наведуваат, „би избегнал евентуални мерки за обезбедување присуство или други мерки што би ги определиле надлежните органи“.
По несреќата, на пратеникот му беа одземени пасошот и возачката дозвола како мерки на претпазливост. Од партијата Левица, пак, изјавија дека нивниот пратеник не бил под дејство на алкохол, додека мопедот бил нерегистриран, неисправен и управуван од малолетник без дозвола и кацига, кој се забил во неговото возило.