Николоски очекува овој или следниот месец да се објави тендерот за третата фаза од пругата кон Бугарија

„Директорите на двете железнички претпријатија заеднички почнуваат со подготовка за апликација за финансирање на проектот за тунелот“, кажа тој во Брисел

Наскоро во македонското Собрание ќе биде ратификуван Договорот за подготовка, изградба и оперативност на меѓуграничниот железнички тунел меѓу Македонија и Бугарија, кој е дел од пругата на Коридорот 8, што на 6 ноември го потпишаа вицепремиерот и министер за транспорт на земјава, Александар Николоски, и неговиот бугарски колега Гроздан Караџов.

Ова од Брисел го соопшти вицепремиерот и министер, Николоски во рамки на неговата работна посета, каде оствари средба со Караџов, со европскиот Координатор за коридорот Западен Балкан – Источен Медитеран, Мариан-Жан Маринеску, како и со директорот на Секретаријатот на Транспортната заедница, Матеј Законшеќ.

На средбата, како што соопштија од Министерство за транспорт, се разговарало за регионалните инфраструктурни проекти кои го потикнуваат рагионалниот развој и економија. 

„Директорите на двете железнички претпријатија заеднички почнуваат со подготовка за апликација за финансирање на проектот за тунелот“,

рекол тој на состанокот.

Според него, се очекува во декември или во јануари следната година да биде објавен тендерот за третата фаза од проектот за железничко поврзување со Бугарија.

Се исполнува сонот на многу генерации – Николоски и Караџов го потпишаа договорот за изградба на меѓуграничниот тунел на пругата од Коридорот 8

Николоски утре ќе учествува на Самитот на министри за транспорт на земјите од Западен Балкан и министри од Европската Унија.