„Оваа алармантна бројка уште еднаш ја потврдува неопходноста и оправданоста на системот, од кој очекуваме значително подобрување на сообраќајната култура, зголемена безбедност за сите учесници во сообраќајот и намалување на штетите и жртвите на патиштата“, велат од Министерството за внатрешни работи
Министерот за внатрешни работи Панче Тошковски денеска го посети објектот, каде што е сместен централниот систем „Безбеден град“ (Safe City) откако денеска стартува пробниот период за автоматизирано регистрирање сообраќајни прекршоци, соопштија од МВР.
По тој повод, Тошковски изјави дека со стартот на овој систем се испраќа јасна порака дека безбедноста на граѓаните е врвен приоритет.
„Нема толеранција за несовесно возење, без разлика дали е во градска зона или на отворен пат. ‘Безбеден град’ е проект кој штити животи и ја враќа дисциплината во сообраќајот“,
вели Тошковски.
Инаку, во првите 12 часа од пробното функционирање на системот биле регистрирани, како што велат од МВР, неверојатни 65 000 прекршоци.
Во 2 800 наврати камерите од „Безбеден град“ „фатиле“ возила како поминуваат на црвено светло, а во 1 000 случаи биле снимени 1 000 нерегистрирани возила.
„Оваа алармантна бројка уште еднаш ја потврдува неопходноста и оправданоста на системот, од кој очекуваме значително подобрување на сообраќајната култура, зголемена безбедност за сите учесници во сообраќајот и намалување на штетите и жртвите на патиштата“,
велат од Министерството за внатрешни работи.
Покрај фотографии, од МВР споделија и видеоснимка од посетата на ресорниот министер на објектот каде што се наоѓа централниот систем на „Безбеден град“.
Оттаму додаваат дека продолжуваат со тестирањето и унапредувањето на системот додека не бил целосно ставен во функција во наредната фаза.
Инаку, пробниот период на системот, кој започна денеска, ќе трае до Нова година, односно до 31 декември. Дотогаш возачите ќе добиваат само предупредување, односно известување за сторен прекршок, без изрекување казни. Од јануари идната година системот ќе почне целосно да се применува.
„Со последните измени на Законот за безбедност на сообраќајот на патиштата, прекршоците документирани со технички средства – камери, сензори и уреди за снимање – се сметаат за валиден доказ. Во првата фаза системот ќе регистрира: брзо возење, минување на црвено светло, истечена важност на сообраќајна дозвола и непрописно паркирање. Во следната фаза е предвидено проширување на спектарот на прекршоци“,
велат од МВР.
Кога системот целосно ќе биде пуштен во употреба сопствениците на возилата за кои е утврден прекршок ќе добиваат СМС порака и електронска пошта со линк за преземање записник со платен налог. Прекршоците ќе можат да се платат електронски, а при навремено плаќање нема да се наплаќаат дополнителни трошоци.
За одредени прекршоци за кои е пропишана и мерка забрана за управување со возило, МВР ќе поднесува барање за поведување постапка до надлежен суд.
