Акцијата започна завчера вечер, неколку часа по примопредавањето на мандатот од досегашната градоначалничка Данела Арсовска, и се очекува да заврши утревечер
Новоизбраниот градоначалник на Скопје, Орце Ѓорѓиевски, денеска на својот фејсбук-профил објави видеоматеријал од тековните активности за чистење на главниот град, најавувајќи дека акцијата влегува во завршна фаза. Чистењето се спроведува согласно неговото предизборно ветување за темелна „чистка“ на Скопје во првите 72 часа од преземањето на функцијата.
Акцијата започна завчера вечер, неколку часа по примопредавањето на мандатот од досегашната градоначалничка Данела Арсовска, и се очекува да заврши утревечер.
Ѓорѓиевски преку социјалните мрежи порача дека работите се одвиваат според планот.
„Скопје го правиме заедно, ви го дадов мојот збор! Се чисти кејот на реката Вардар. Се поставуваат украсни канделабри на плоштадот ‘Македонија’. Најдоброто, доаѓа“, .
објави Ѓорѓиевски попладнево.
Во акцијата се вклучени луѓе и механизација од сите комунални претпријатија на Скопје, вклучувајќи го и ЈП „Улици и патишта“.
Претходно од претпријатието рекоа дека со механизација и рачно се чисти коритото и косините на реката Вардар и декасе отстранува кабаст отпад, пластична амбалажа и земјен материјал насобран во централниот дел на кејот.
Истовремено, екипи работат и на празнење на контејнерите од насобраното ѓубре низ градот.