На 6 мај тројцата обвинети со „фолксваген голф“ дошле до објектот и ги подготвувале каблите за транспорт, но при удар со кабел еден од нив се здобил со повреди. Најпрво отишле во Ургентниот центар „Мајка Тереза“ каде што му била укажана помош, а потоа сите заедно повторно се вратиле во објектот, ги зеле алатите и се обиделе да го напуштат местото, но биле затекнати и приведени веднаш по излезот од кругот на „Железара“
Основното јавно обвинителство Скопје поднесе обвинение против три лица за кражба на повеќе километри високоенергетски и среднонапонски кабли во сопственост на „Електрани на Северна Македонија“ (ЕСМ) и „Макстил“ од кругот на фабриката „Железара“ во Скопје, односно од објектот на „Полуконти – ИГМ“ и подземните тунели низ кои поминуваат кабли за напојување со електрична енергија, во вкупна вредност од околу 440 илјади евра.
Обвинети се дека како соизвршители, заедно со други лица што сè уште не се идентификувани, сториле кривично тешка кражба од објекти на јавни инсталации кои се од посебно значење за сигурноста на луѓето и имотот.
„Во периодот од март до почетокот на мај годинава, во повеќе наврати, преку отвори со скалила кои водат во подземните тунели, обвинетите влегувале од погонот на ‘Полуконти – ИГМ’ и откако со апарат се уверувале дека каблите не се под напон, со батериска брусалка ги сечеле и ги складирале до влезот од тунелите. Поради нивните дејствија, на 9 април настанал и пожар во трафостаницата ТС ‘Југ’, со кој била предизвикана и дополнителна штета на јавните инсталации, за чие санирање биле потребни повеќе од 100 илјади евра, а не се реализирало и планираното производство и дистрибуција на електрична енергија кон крајните корисници на електрична енергија за период на санација на дефектите во вредност од околу 60 илјади евра“,
наведуваат од ОЈО Скопје.
На 6 мај тројцата обвинети со „фолксваген голф“ дошле до објектот и ги подготвувале каблите за транспорт, но при удар со кабел еден од нив се здобил со повреди. Тројцата најпрво отишле во Ургентниот центар „Мајка Тереза“ каде што му била укажана помош, а потоа сите заедно повторно се вратиле во објектот, ги зеле алатите и се обиделе да го напуштат местото, но биле затекнати и приведени веднаш по излезот од кругот на „Железара“.
„До Основниот кривичен суд Скопје е доставен предлог за продолжување на претходно определената мерка притвор за тројцата обвинети бидејќи постојат опасноста од бегство, можноста за влијание врз сведоци и ризикот да го повторат делото како основи поради кои таа мерка беше првично побарана и определена“,
додаваат од Обвинителството.