Учениците се вклучени онлајн на часовите заедно со соучениците, додека со дел од нив наставниците одржуваат индивидуална настава преку алатките за настава на далечина
Триесет ученици кои се подолго од три недели на болничко или на домашно лекување, од почетокот на учебната година наставата ја следат од далечина. Дел од нив се вклучени онлајн на часовите заедно со соучениците, додека со дел од нив наставниците одржуваат индивидуална настава користејќи ги алатките што вообичаено се употребуваат за настава на далечина, како платформите Едуино и nastava.mk.
Министерство за образование и наука од почетокот на новата учебна година, во соработка со Министерството за здравство и невладината САНО – Здружение за поддршка на децата заболени од канцер, воведе формално образование во здравствените установи и во домашни услови, односно секој ученик кој е хоспитализиран или е на лекување во домашни услови подолго од три недели, може од далечина да ја следи наставата во своето одделение или, пак, наставникот со него да организира индивидуална настава.
Од Министерството за образование велат дека станува збор за системска мерка која е уредена во закон и со подзаконски акти.
„Ниту еден ученик нема, ниту смее да биде лишен од образование само затоа што се лекува. Здравствената состојба не значи изолираност, прекин на образованието или заборавеност, туку напротив, болеста е предизвик, а општеството е обврзано да им даде поддршка и надеж“,
информираат од МОН.
Пред почетокот на учебната година, на промовирањето на проектот, министерката Весна Јаневска изјави дека досега кон овие дечиња биле направени сериозен пропуст и дискриминација, а дека со ова системско решение „се покажува дека не станува збор за нерешлив проблем“.