Владата вчера соопшти дека премиерот Мицкоски и неговиот српски колега Мацут разговарале за унапредување на билатералните односи, економската соработка и инфраструктурното поврзување. Акцент бил ставен и на трговската размена, заедничките енергетски проекти и олеснувањето на движењето на луѓе и стоки
Посетата на официјален Белград во Скопје среде кампања е доказ дека Северна Македонија се лизга кон статус на „третата српска република“, реагираат од ДУИ по вчерашната посета на српскиот премиер Ѓуро Мацут. За време на официјалната посета на земјава, Мацут вчера се сретна со премиерот Христијан Мицкоски во Владата.
„Во средина на една одлучувачка изборна кампања, кога албанските граѓани се соочени со историски референдум за својата иднина, премиерот од Белград со целиот владин кабинет слета во Скопје со гостопримство од Мицкоски и ВРЕДИ. Овој чин е најасен доказ дека Северна Македонија се лизга кон статус на ‘третата српска република’. Меѓународните извештаи, вклучувајќи ги и оние на Европскиот парламент, го потенцираат опасното влијание на ‘српскиот свет’ во нашата земја. Денес тоа влијание се запечати со нови договори, продадени како ‘економска соработка’ и ‘регионална стабилност’, но кои всушност претставуваат целосно заробување на државата од Белград со благослов на ВРЕДИ“,
се вели во реакцијата на ДУИ.
Оттаму прашуваат што се дискутирало на средбата во Владата, за што се договориле двете влади и кои друго области „ќе бидат предадени на српско влијание“.
„Вистината е едноставна: Мицкоски и ВРЕДИ се алатки на ‘српскиот свет’, а Албанците ја плаќаат и ќе ја плаќаат цената на оваа сервилност“,
велат оттаму.
Инаку, Владата вчера соопшти дека премиерот Мицкоски и неговиот српски колега Мацут разговарале за унапредување на билатералните односи, економската соработка и инфраструктурното поврзување. Акцент бил ставен и на трговската размена, заедничките енергетски проекти и олеснувањето на движењето на луѓе и стоки.
„Премиерот Мицкоски истакна дека Србија е искрен партнер и пријател, со кого ја споделуваме визијата за стабилен, безбеден и просперитетен Балкан. Премиерот Мацут изрази поддршка за реформските процеси во државата и нагласи дека Белград и Скопје ќе продолжат да соработуваат на заеднички проекти кои се во интерес на граѓаните на двете земји. Двете страни се согласија дека продлабочувањето на пријателските врски меѓу двете држави претставува значаен придонес за регионалната стабилност и европската перспектива на Западен Балкан“,
соопштија од Владата.
