На приемот, како што пишува претседателката во објава на Фејсбук, имала можност да поразговара со францускиот претседател Емануел Макрон, со бугарскиот премиер Росен Жељазков, со британскиот премиер Кир Стармер, со претседателот на Литванија и со премиерите на Финска и на Малта, за што изрази задоволство
Претседателката Гордана Сиљановска-Давкова вчера присуствувала на прием организиран од кралот на Данска, Фредерик Десетти и кралицата Мери Елизабет, во пресрет на седмиот состанок на Европската политичка заедница во Копенхаген, каде што шефицата на државата ќе земе свое учество.
На приемот, како што пишува Сиљановска-Давкова во објава на Фејсбук, имала можност да поразговара со францускиот претседател Емануел Макрон, со бугарскиот премиер Росен Жељазков, со британскиот премиер Кир Стармер, со претседателот на Литванија и со премиерите на Финска и на Малта, за што изрази задоволство.
„Ветувачки почеток во пријателска атмосфера и плоден разговор пред утрешните дискусии на коишто ќе ги претставам македонските позиции, согласно со нашите национални интереси“,
напиша претседателката во објавата на Фејсбук.
Сиљановска-Давкова ќе учествува на седмиот состанок на Европската политичка заедница каде што ќе се обрати на панел-дискусијата „Безбедност и отпорност – традиционални и нови закани“, со која ќе претседаваат францускиот претседател Емануел Макрон и албанскиот премиер Еди Рама.
На состанокот во Копенхаген се поканети 47 шефови на држави и влади. Клучни теми ќе бидат војната во Украина и потребните чекори за посилна и побезбедна Европа во амбиент на конфликтна геополитичка ситуација.