За предложената резолуција од страна на лидерот на СДСМ, Венко Филипче, премиерот даде неколку забелешки. Она што веднаш му паднало во очи, како што рече, е што во преамбулата на резолуцијата се содржани неточни факти и лаги, а на таков начин, како што додаде, не се штитат македонските национални интереси
Премиерот Христијан Мицкоски попладнево од Струмица најави дека по завршувањето на локалните избори во Собранието ќе предложат т.н. македонска резолуција, која ќе има за цел да ги штити македонските национални интереси.
Ова премиерот го изјави одговарајќи на новинарско прашање да даде коментар за предлог-резолуцијата за утврдување на националните позиции во однос на евроинтеграцискиот пат на земјава, која денеска беше претставена од страна на лидерот на Социјалдемократскиот сојуз (СДСМ), Венко Филипче.
Посочи дека имал кратко време да го прочита документот што СДСМ денеска го достави во Собранието и немал време да навлезе во детали бидејќи за тоа, како што рече, ќе се дискутира после изборите.
Сепак, даде неколку забелешки, посочувајќи дека она што веднаш му паднало во очи е што во преамбулата на резолуцијата се содржани неточни факти и лаги. Додаде дека на ваков начин не се штитат македонските национални интереси.
„Да речеме се обидува да се негира еден историски факт и да се каже дека македонскиот јазик бил официјален јазик во ОН од 2019 година. Тоа една монструозна лага, посебно во годината кога славиме 80 години од кодификацијата на македонскиот јазик и неговото примање во Обединетите нации како официјален јазик на тогашната југословенска федерација заедно со српскохраватскиот и словенечкиот јазик. Би сакал овој монструозен фалсификат, кој е дел од оваа резолуција, македонската јавност категорички да го отфрли и да го осуди“,
рече Мицкоски.
Додаде и дека во предложената резолуција има и неколку други фалсификати, а тоа е дека во 2005 година Северна Македонија не доби датум за почнување на преговори, туку Република Македонија, односно тогашната држава која во меѓународниот поредок се нарекуваше Поранешна Југословенска Република Македонија.
„И во 2009 година прв позитивен извештај за отпочнување преговори доби Република Македонија согласно Уставот. Самата конструкција е лажна, но тоа е типично за СДСМ. Последно што сега би го искоментирал е што во самата резолуција се зборува за копенхашките критериуми, а потоа се цитираат двата билатерални договори со Грција и Бугарија. Едно со друго не е комплементарно“,
кажа тој.
Според него, има многу што да се даде како инпут во предложената резолуција и најави дека ВМРО-ДПМНЕ како одговорна државотворна партија ќе направи една вистинска резолуција.
„Еве, како подлога ќе ја искористиме оваа резолуција и преку собраниските комисии по завршувањето на изборите ќе формираме т.н. македонска резолуција, која ќе има за цел да ги штити македонските национални интереси. Нешто што, за жал, за СДСМ видовме во минатото дека не постои. Жал ми е што и овој претседател на СДСМ, како и неговите двајца претходници, продолжува по таа патека. Додека ужива на скапите јахти, смислува резолуции што имаат за цел да ги распродаваат македонските национални интереси“,
вели премиерот.
Лидерот на СДСМ, Венко Филипче, денеска на прес-конференција во седиштето на партијата ја претстави предлог-резолуцијата за утврдување на националните позиции во однос на евроинтеграцискиот пат на земјава.
Резолуцијата за т.н. црвени линии за земјава, која опозициската партија ја најавуваше подолг период, како што рече Филипче, се фокусира на два аспекта.
Првиот се однесува на почитување на определбата за безусловно почитување на јазичните, идентитетските, историските и културните особености на македонскиот народ, како елементи за кои не се преговара со Европската Унија. Вториот – дека земјава е подготвена да ги исполни обврските од Преговарачката рамка со ЕУ, со исполнување на уставните измени, без прифаќање нови барања од билатерален или идентитетски карактер.