На прашањето од каде потекнуваат тие надворешни или внатрешни центри на моќ, премиерот рече дека не сака да коментира за нивното географско потекло, но дека она што го кажува е врз основа на информациите со кои располага и од основаните сомненија што ги имаат како Влада
Имаме основано сомнение кој може да биде инспиратор за сето што се случуваше. Сепак, сум задоволен што институциите успеаја да го совладаат предизвикот и сега состојбата и во „Дрисла“, во Вардариште и во Трубарево е нормална и нема чадење. Ова вечерва го изјави премиерот Христијан Мицкоски во интервју на Тв Алсат-М, одговарајќи на новинарско прашање дали се пронајдени центрите на моќ што преку пожари се обидуваат да внесат страв и паника кај граѓаните пред локалните избори.
„Состојбата е под контрола, а граѓаните треба да бидат мирни и спокојни. Институциите се справуваат екстремно брзо со вакви предизвици“,
рече тој.
На прашањето од каде потекнуваат тие надворешни или внатрешни центри на моќ, премиерот рече дека не сака да коментира за нивното географско потекло, но дека она што го кажува е врз основа на информациите со кои располага и од основаните сомненија што ги имаат како Влада.
„Што се однесува за дома, веќе имаме група од дваесетина лица, која е под мониторинг и за која постои основано сомневање дека девојантно се однесувала во изминатиот период. Оставам на органите на прогонот да си ја завршат својата домашна задача“,
вели Мицкоски.
На инстистирањето на новинарката да каже кои се центрите на моќ за кои веќе неколку пати јавно зборува, премиерот одговори дека тоа се тие што сакаат Македонија да биде поразена и да не напредува.
„Тие центри на моќ не сакаат Македонија да биде успешна земја, кои не сакаат да имаме стабилна состоја, која ќе се развива, која ќе ниже успеси, ќе расте економски, ќе владее правото, ќе нема корупција и криминал, како што тоа се случуваше во изминатите 15 месеци. Тие сакаат да ја видат онаа Македонија од пред седум години, понижена, поразена, ограбена, засрамена, со политичари што се моделираат, со свиткани кичми. Тоа се тие центри на моќ“,
рече Мицкоски.
Во врска со она што се презема за справување со пожарите, кажа дека од почетокот на сезоната на пожари до денеска, има повеќе од 30 лица приведени, за кои постојат сомнежи, но и докази дека учестувале во нивно подметнување.
Додаде и дека приведени има и за пожарите во Вардариште, Трубарево и „Дрисла“.
„Од случувањата во јули, кога наеднаш во околината на Скопје, на неколку локации се случија големи пожари, неколку лица беа приведени. За неколку лица постоеше основано сомнение дека учествувале во подметнување на пожари. Во Вардариште имаше акција, а полицијата приведе неколку лица и за нив е одредена мерка притвор. Истото беше и во Трубарево“,
вели тој.
Според него, најголем дел од пожарите не се случајни, како и дека сите пожари што се случуваат можеби не потекнуваат од човечки фактор, но најглем дел од нив се предизвикани од човечки фактор.
Коментирајќи ги пожарите што се случуваат во државата, Мицкоски пред неколку дена рече дека тие се организирани од центри на моќ од државата и надвор, за што, додаде дека има информации од службите.