Изминатите 24 часа биле изгаснати 20 пожари на отворен простор каде што гореле ниска вегетација, стрништа, ѓубре, но имало и случаи на пожари во шуми
Изминатото деноноќие, според извештајот на Центарот за управување со кризи (ЦУК), на територијата на земјата биле регистрирани вкупно 25 пожари на отворен простор.
Од нив, три пожари сè уште се активни. Едниот е во Општина Гази Баба, во атарот на селото Виниче, каде што гори нискостеблеста шума. Вториот пожар е во Општина Гевгелија, на планината Кожуф кај селото Петрово, каде огнот од приземен пожар се проширил и зафатил букова шума. Третиот активен пожар е во Општина Зелениково, во селото Вражале, каде што горат борови насади.
Од ЦУК велат дека пожарите во Општина Гази Баба, кај селото Трубарево во објект на фирма за третирање на електронски отпад и во Општина Студеничани, на депонијата „Дрисла“, се под контрола.
Во изминатите 24 часа, од ЦУК велат дека изгаснати се 20 пожари во различни општини низ државата, меѓу кои во Гази Баба, Петровец, Студеничани, Битола, Крушево, Прилеп, Долнени, Кичево, Свети Николе, Куманово, Старо Нагоричане, Ранковце, Гостивар, Јагуновце, Брвеница, Гевгелија и Радовиш.
Во повеќето од изгаснатите пожари горела ниска вегетација, стрништа, ѓубре, но имало и случаи на пожари во шуми.