Од Обвинителството информираа дека увидот се презема во однос на настанувањето на пожарот, како и во однос на складирањето на отпадот на локацијата
Во објектот во кој се случи пожарот во скопско Трубарево денеска е извршен увид од страна на обвинител од скопското обвинителство и увидни екипи на МВР. Од Обвинителството информираа дека увидот се презема во однос на настанувањето на пожарот, како и во однос на складирањето на отпадот на локацијата.
На местото е извршено фотографирање и дронско снимање на локацијата.
„Со оглед на затрупувањето на локацијата од безбедносни причини, увидните дејствија на терен се отежнати. По наредба на јавен обвинител, локацијата ќе остане обезбедена и во наредниот период за потребите на постапката. Таму ќе продолжат да се вршат дополнителни мерења на загадувањето од Министерството за животна средина, а на терен ќе излезе и вешто лице од областа на екологијата“,
наведуваат од Обвинителството.
На местото на кое избувна пожарот и натаму има противпожарна екипа бидејќи и натаму има повремени чадења и постои опасност за ново разгорување на огнот.
Од Обвинителството посочуваат дека продолжуваат да се преземаат дејствија за целосно испитување на настанот.
Претходно денеска, Основниот кривичен суд Скопје им го продолжи притворот за нови 48 часа на четворицата опфатени во постапката во врска со пожарот. Четворицата се осомничени за загрозување на животната средина.