Горештините убиваат десетици илјади луѓе во Европа секоја година. Истражувачите проценуваат дека опасните температури во Европа ќе убијат од 8 000 до 80 000 луѓе повеќе годишно до крајот на векот
Екстремно топлото време урива температурни рекорди низ цела Европа и предизвикува се поголеми и посилни пожари, покажуваат првичните мерења, пишува „Гардијан“.
Во југозападна Франција рекордите се урнати во неколку града, а „Метео франс“ соопшти дека честопати максималните температури во регионот биле 12 Целзиусови степени над нормалата за последните неколку децении.
Во Хрватска рекорди во температурата се измерени во Шибеник – 39,5 Целзиусови степени и во Дубровник – 38,9 степени, а големи шумски пожари беснеат во неколку делови од земјата.
Надвор од Европа, десетици температурни рекорди се урнати низ цела Канада, а рекордната топлина над 50 степени во Ирак е причина за прекини во снабдувањето со струја во целата земја.
Топлотниот бран во јужна Европа доаѓа во време кога нордиските земји овој месец закрепнуваат од невидени температури над 30 Целзиусови степени во Арктичкиот круг, додава „Гардијан“.
Боб Ворд, директор за политики во Истражувачкиот институт „Грантам“, вели дека ова лето, како и секое лето, е исклучително во однос на екстремната топлина низ целиот свет.
Во Италија, каде што 16 од 27 големи града беа ставени под црвени предупредувања за топлина, а четиригодишно момче почина од топлотен удар, и во Шпанија, каде што еден човек почина во шумски пожар откако претрпе изгореници на 98 отсто од телото, топлината не собори голем број рекорди, но сепак го вклучи алармот.
„Главната карактеристика на топлотниот бран е должината и обемот, а не интензитетот. Но, температурите сè уште се многу високи“,
вели Хозе Камачо, климатски научник и портпарол на „Аемет“, шпанската метеоролошка агенција.
Во југозападна Франција 40 отсто од метеоролошките станици во понеделникот регистрирале температури над 40 степени.
Лоријан Бате, климатски научник во „Метео франс“, вели дека е прерано да се каже дали рекордите се уриваат, но додава дека географскиот обем на топлината е значаен.
„За жал, тоа е очекувано“,
вели таа.
Бате додава дека повеќе од половина од 51 топлотен бран во Франција од 1947 година се случиле во последните 15 години.
„Јасно е дека тоа е знак дека климата се затоплува“,
додава таа.
Жешкото време низ Европа ја исуши вегетацијата и дозволи пожарите да се шират, во она што научниците го опишаа како „молотов коктел“ од климатски услови.
Научниците за пожари од ЕУ предвидуваат „екстремни до многу екстремни услови“ низ целиот континент оваа недела, со особено сериозни ризици во поголемиот дел од Јужна Европа и аномалии што се очекуваат во делови од нордиските земји.
Шумските пожари во Европа досега изгореа повеќе од 400 000 хектари оваа година, според податоците објавени вчера, што е за 87 отсто повеќе од просекот за ова време од годината во последните две децении.
Горештините убиваат десетици илјади луѓе во Европа секоја година. Истражувачите проценуваат дека опасните температури во Европа ќе убијат од 8 000 до 80 000 луѓе повеќе годишно до крајот на векот, бидејќи животите изгубени поради посилна топлина ги надминуваат оние спасени од поблаг студен период.
Антонио Гаспарини, епидемиолог на Лондонската школа за хигиена и тропска медицина, вели дека спроведувањето ефикасни и разновидни мерки за јавно здравје е клучно бидејќи топлотните бранови стануваат почести.
„Ова е уште еден екстремен топлотен бран што ја погодува Европа ова лето. Како и во претходните настани во изминатите месеци, можеме да очекуваме не само значителен број на жртви, туку и силни географски разлики во прекумерната смртност“,
рече тој.
Минатата недела, Светската метеоролошка организација соопшти дека шумските пожари и лошиот квалитет на воздухот ги зголемуваат негативните ефекти од екстремната топлина врз здравјето. Во неа се забележува дека температурите во текот на првата недела од август достигнале повеќе од 42 Целзиусови степени во делови од Западна и Јужна Азија, поголемиот дел од Северна Африка, Јужен Пакистан и југозападниот дел на САД, при што температурите надминуваат 45 Целзиусови степени.
„Вака изгледаат климатските промени. И само ќе се влошуваат“,
рече Ворд.