Во документот се повикува Израел да дозволи премин на сите конвои со хуманитарна помош од меѓународни невладини организации и да ги отстрани пречките што ги спречуваат хуманитарните служби да интервенираат
Министрите за надворешни работи од 24 земји и високи претставници на Европската Унија предупредија дека хуманитарната криза во Газа достигна незамисливи нивоа и го повикаа Израел да ги укине ограничувањата за помош и меѓународни невладини организации што работат на територијата.
„Хуманитарното страдање во Газа достигна незамисливи нивоа. Гладувањето се одвива пред нашите очи. Хуманитарниот простор мора да биде заштитен, а помошта никогаш не треба да се политизира“,
се вели во заедничка изјава издадена од ЕУ.
Во документот се повикува Израел да дозволи премин на сите конвои со хуманитарна помош од меѓународни невладини организации и да ги отстрани пречките што ги спречуваат хуманитарните служби да интервенираат.
Соопштението го потпиша високата претставничка на ЕУ за надворешна политика и безбедност Каја Калас.
Државите кои се потписнички на заедничката изјава се Австралија, Белгија, Канада, Данска, Естонија, Финска, Франција, Грција, Исланд, Ирска, Јапонија, Литванија, Луксембург, Малта, Холандија, Норвешка, Португалија, Словачка, Словенија, Шпанија, Шведска, Швајцарија и Велика Британија.