Истражувањето покажало и дека употребата на никотинските кесички кај младите во САД драматично пораснала, со зголемување од над 760% помеѓу 2020 и 2023 година
Никотинските кесички стануваат се почест извор на никотинско труење кај мали деца, покажува американско истражување спроведено од истражувачи од болницата „Nationwide Children’s Hospital“ во Охајо, САД. Како што пренесува Си-ен-ен, анализирани се податоци во период од една деценија, опфаќајќи над 134 000 случаи на деца под 6-годишна возраст кои случајно проголтале никотин преку производи како електронски цигари (вејпови), гуми за џвакање и пастили.
„Станува збор за производ со висока концентрација на никотин, а плус има и пријатен вкус. Нема ништо што ќе му сигнализира на детето дека тоа е нешто лошо и дека треба да го исплука. И тука настанува проблемот,“
вели Натали Рајн, директорка на Центарот за труења во Охајо.
Иако во поголем број од случаите на детско труење со никотин немало тешки последици, студијата открила дека над 1 600 деца доживеале сериозни нарушувања на здравјето. Регистрирани се и два смртни случаи по голтање течен никотин.
Препораките до родителите, како што се наведува во студијата се – да не користат никотински кесички пред деца, за да спречат тие да го имитираат нивното однесување. Лекарите исто така потсетуваат никотинските производи да се чуваат надвор од дофат на деца и да се разговара со сите други згрижувачи, како дадилки или поширокото семејство, да постапуваат на ист начин.
Истражувањето покажало и дека кај повеќето видови на употреба на никотин, бил забележан пад по 2016 година, додека употребата на никотинските кесички – драматично пораснала, со зголемување од над 760% помеѓу 2020 и 2023 година.
Минијатурните бели пакети кои се ставаат помеѓу усната и непцето за првпат се појавиле во САД во 2014 година. Тие не содржат тутун, туку се наполнети со никотин – синтетички или природно добиен , заедно со ароми и засладувачи.
Според Центрите за контрола и превенција на болести во САД (CDC), тие станале вториот најчесто користен никотински производ меѓу младите. Националната анкета за употреба на тутун кај млади лица покажала дека користењето никотински кесички кај тинејџерите се удвоило помеѓу 2021 и 2024 година.
Сепак, вкупниот број корисници сè уште останува мал. Само 0,5% од Американците користат никотински кесички, во споредба со 9% кои пушат цигари и 3% кои користат електронски цигари или вejпови, според податоци од Бирото за статистика на САД.