На точката на Заев за избори на 5 јули додавам уште две точки, за реченицата да биде продолжена, изјави лидерот на ВМРО-ДПМНЕ, не давајќи прецизен одговор дали опозицијата би учествувала на избори 22 дена по завршувањето на ова продолжение на вонредната состојба
Лидерот на ВМРО-ДПМНЕ вели дека опозицијата останува на позицијата дека нема услови за одржување избори кога секојдневно се зголемуваат бројките на заразени и починати од ковид-19, така што државата, според него, поминува низ вториот врв на првиот бран на епидемијата. Ставот на ВМРО-ДПМНЕ и натаму е дека избори би можеле да се одржат кон крајот на август или на 13 септември, согласно предлогот што Мицкоски го презентираше на последната лидерска средба.
Лидерот на ВМРО-ДПМНЕ вели дека откако од петокот значително се влошила ситуацијата со коронавирусот не функционира повеќе „каналот за комуникација“ меѓу партиите во однос на изборите. За вчерашната најава на лидерот на СДСМ, пак, дека гласањето ќе биде на 5 јули, Мицкоски рече дека на точката на Зоран Заев тој додава уште две точки за, како што наведува, реченицата да продолжи.
„Јас не се плашам ниту од избори, ниту од репресијата на Заев ниту од ‘трас-трас’ судството или ‘луј витон’ обвинителството. Единствено ме плаши да не изгубиме уште животи и да не го загрозиме дополнително јавното здравје. Треба прво да го победиме вирусот, а потоа ќе го победиме и Заев на избори“,
рече Мицкоски на денешната прес-конференција, на која го критикуваше владеењето на СДСМ во изминатите три години.
Повторувајќи дека не бега од избори, дека „Заев е готов“ и дека ВМРО-ДПМНЕ останува отворена за компромис за изборите по смирувањето на епидемијата, Мицкоски не даде прецизен одговор дали опозицијата би учествувала на избори на 5 јули, како термин за кој Заев рече дека е последна отстапка.
„Наместо да предложат некој нов протокол, нова мерка за справување со коронавирусот, тие глумеа нормализација и ги потценија последиците од епидемијата. Комисијата за заразни болести, наместо да носи препораки, ги презентира политичките директиви на Заев, а политичарот Караџовски прави споредби со Бразил наместо со земји како Словенија. На Заев половина партија му е во карантин, а тој како грамофонска плоча повторува: ‘избори, па избори”,
рече Мицкоски.