Во однос на обидите за консензус, лидерот на СДСМ рече дека имало канали за комуникација на сите можни нивоа, но дека не е постигнат договор. Затоа, како што наведе, првата седмица од јули е последната отстапка
Гласањето на десеттите парламентарни избори ќе биде на 5 јули, категоричен е лидерот на СДСМ, Зоран Заев.
На денешната прес-конференција, тој оцени дека веќе нема аргументи за продолжување на вонредната состојба, затоа што, како што оцени, опаѓа интензитетот на коронавирусот, и покај повторно зголемените бројки на новозаболени.
„Голем број од новодијагностицираните случаи на коронавирусот се од периодот кога имаше полициски час. Тоа е резултат од неодговорното однесување на министерот за внатрешни работи Наќе Чулев. Вирусот е тука и ќе биде присутен и на 5 јули, и на 5 август, а веројатно и на 5 октомври и на 5 јануари следната година. Сите сме исправени пред предизвикот за справување со глобалните предизвици од пандемијата. Но за тоа се потребни функционални институции“,
рече Заев на прес-конференцијата по повод тригодишнината од смената на власта во земјава.
Тој рече дека, во ситуација кога нема правна основа за свикување на распуштениот парламент, државата веќе ниту еден ден не смее биде без законодавна власт.
„Не може Владата дење да биде извршна, а навечер законодавна власт. Тоа не е добро ниту за јавното здравје, ниту за економијата, ниту за демократијата и за човековите права“,
нагласи Заев.
Во однос на обидите за постигнување консензус за изборниот датум, тој рече дека имало канали за комуникација на сите можни нивоа, но дека не е постигнат договор, иако, како што наведе, партиите биле многу блиску да се договорат.
„Затоа одлучивме да сугерираме продолжување на вонредната состојба за уште две седмици, но веќе нема аргументи за вонредна состојба. Изборите нема да бидат ниту на 14, ниту на 21, или 28 јуни. Со 5 јули ја правиме последната отстапка. Има простор од 35 дена за сите субјекти да се подготват за изборите, овој пат во посебни услови и со почитување на мерките на заштита од коронавирусот“,
рече Заев.