Од СДСМ велат дека на овој начин премиерот потврдува дека нема допир со реалноста и не ги разбира граѓаните и нивните проблеми, не ги разбира младите, луѓето што живеат сами и семејствата што едвај врзуваат крај со крај. Наместо решенија, додаваат, тој нуди казни
Опозицискиот СДСМ ја оцени за длабоко конзервативна и погрешна идејата за воведување дополнителен данок на немажени и неженети што денеска ја објави премиерот Христијан Мицкоски. Ваквите, како што велат од СДСМ, недемократски мерки, немаат место ниту во земјите од третиот свет, а не, пак, во демократски држави за кои се смета Македонија, со кои директно се гази на правата, слободниот избор на граѓаните и ја ништи нивната волја.
Од партијата велат дека на овој начин премиерот потврдува дека нема допир со реалноста и не ги разбира граѓаните и нивните проблеми, не ги разбира младите, луѓето што живеат сами и семејствата што едвај врзуваат крај со крај. Наместо решенија, велат од СДСМ, тој нуди казни.
„Има огромен број на луѓе кои сакаат да се во брак и да имаат деца што ќе ги гледаат како растат во радост, но од здравствени или други причини и не можат да ги имаат. Свесен ли е Мицкоски дека секое трето дете живее во сиромаштија? Свесен ли е дека половина милион граѓани живеат со плата под просечната? Што напарави Мицкоски да им обезбеди подобри услови на живот на овие луѓе, поголеми плати или пак сигурна иднина? Што направи за да им овозможи услови да растат деца во достоинство и со нормален приход?“,
велат од партијата.
Оттаму додаваат дека луѓето понекогаш остануваат сами бидејќи животот ги принудил, а има и такви кои, како што велат, се плашат дека нема да можат да се изборат со сè што оваа држава им става на плеќи. Опозиционерите посочуваат дека не е време за казнување, туку за вложување во луѓето.
„Време е на луѓето да им се даде причина да останат, да сакаат, да се венчаат и да имаат деца тука затоа што веруваат дека тука има иднина. Решението за негативниот наталитет и иселувањето не е во понижувачки даноци, туку во тоа да се покаже дека секој има своја вредност, шанса и поддршка. Оние што сакаат да останат и да изградат живот овде се храбри, наместо да ги казнуваме, треба да ги поддржиме“,
велат од СДСМ.
Премиерот Христијан Мицкоски денеска, говорејќи за демографските предизвици во земјава и намалениот наталитет од година вo година, рече дека Владата сериозно размислува да воведе дополнителни даноци за немажените и неженетите граѓани во државата.
Мрежата за заштита од дискриминација остро ја осуди изјавата на премиерот, оценувајќи дека потенцијалната мерка не само што би била ретроградна, туку и дискриминаторска бидејќи, пред сè, ги крши човековите права – на избор, на приватен и семеен живот, правото на планирање семејство, животен стил, семејна состојба и иднина.