Ова е втора награда за филмот кој претходно доби награда на филмски фестивал во Лондон, а истиот се емитува и на телевизија Алџезира
Македонскиот документарен филм „Сонцето не грее на сите страни”, во режија на Глигор Кондовски, доби награда за најдобар документарен филм на осмиот по ред филмски фестивал во Ново село, Србија, кој се одржа од 26 до 29 јуни.
Ова е втора награда за филмот кој претходно доби награда на филмски фестивал во Лондон, а истиот се емитува и на телевизија Алџезира.
Глигор Кондовски, покрај што е режисер, магистер по филмско и ТВ сценарио, е и композитор. Моментално е на мастер студии по композиција кај проф. м-р Дарија Андовска. Зад себе има оставено многу музички албуми, изложби на фотографии поддржани од Министерство за култура и многу мултимедијални проекти.
Има добиено неколку награди на државниот филмски фестивал, два пати Гранд при, награда за најдобра камера и трета награда. Со документарниот филм „Постојам” чија тема е посветена на егзодусот на Македонците од Егејска Македонија, се појавува на неколку филмски фестивали во Хрватска, Србија, Бугарија и во Велика Британија.
Филмот говори за патешествието на Македонците кои со години оделе на печалба во други држави. Конкретно, темата е за македонската миграција во Австралија.
Филмот е во продукција на „Револушн продукција” во режија на Глигор Кондовски, а продуцент на филмот е Дејан Милошевски, камера Беби Зекировски и Слаѓан Милошевски.