ДУИ истакнува дека комесарката Марта Кос е искрен и значаен пријател на нашата држава, не само поради нејзината функција клучна за евроинтеграциите и личната врска со регионот, туку пред сè поради нејзиниот „длабоко европски пристап кон почитување на различностите и заштита на етничките посебности во Европа“
Демократската унија за интеграција (ДУИ) денеска ја обвини Владата дека со своето однесување ја оддалечува државата од искрените пријатели и од европскиот пат.
Повод за писмената реакција од ДУИ велат дека е односот кон еврокомесарката за проширување и добрососедска политика, Марта Кос, која изминатите два дена беше во посета на земјава на лидерскиот самит на ЕУ – Западен Балкан.
ДУИ истакнува дека комесарката Марта Кос е искрен и значаен пријател на нашата држава, не само поради нејзината функција клучна за евроинтеграциите и личната врска со регионот, туку пред сè поради нејзиниот „длабоко европски пристап кон почитување на различностите и заштита на етничките посебности во Европа“.
Според ДУИ, Владата ја пропуштила можноста да ги зајакне овие врски за време на Самитот на лидерите на Западен Балкан со Европската Унија. Наместо тоа, ДУИ обвинува за „недостиг на гостопримство и нетолеранција, дури и кон најискрените пријатели на државата“.
Во соопштението ДУИ се осврнува на изјавата на комесарката Кос дека идентитетот не е предмет на политички условувања, туку суштина на човековото достоинство и израз на неговата посебност. ДУИ смета дека не смеело да се дозволи оваа изјава да стане „цел на кампања на омраза и потсмевање“, особено ако таа реакција била поттикната од „извори блиски до власта“.
ДУИ упатуваат критика и до министерот за европски прашања Орхан Муртезани, при што изразуваат загриженост што министерот не сметал дека е потребно јавно да го одбрани ставот на комесарката Кос, ниту да го истакне значењето на вредностите кои се темел на институцијата што ја раководи.
„Напротив, со своите неточни и релативизирачки ставови, тој стана дел од една линија на однесување која го доведува во прашање односот со еден од најсилните гласови што ја поддржуваат нашата европска перспектива“,
се вели во соопштението од ДУИ.
Од ДУИ велат дека во време кога државата има потреба од стабилни партнерства и јасно раководство во процесот на интеграција, „оваа тишина, и во одредени моменти оправдување на националистичките ставови, не претставува технички, туку политички неуспех“.
„Министерот Муртезани има суштинска одговорност: да го брани европскиот курс, а не да молчи кога тој е нападнат“,
порачуваат од ДУИ додавајќи дека граѓаните заслужуваат посериозно и подостоинствено претставување во овој процес, а меѓународните пријатели почит, а не организирано потценување одвнатре.
Еврокомесарката Кос на вчерашната заедничка прес-конференција со премиерот Христијан Мицкоски рече дека за Европската комисија ситуацијата е јасна и дека доколку Северна Македонија ги исполни обврските и го промени Уставот, тогаш веднаш ќе започне меѓувладината конференција за отворање на кластерите без какви било други политички условувања.
Она што предизвика реакција во јавноста е изјавата во која таа употреби референци на традиционалната храна како дел од македонскиот идентитет.
Премиерот Христијан Мицкоски рече дека земјата ги прифаќа европските вредности, меѓутоа се противи на уцените кои не се дел од тие вредности.
Вчера министерот за европски прашања Орхан Муртезани изјавата на Кос рече дека ја отсликува европската перцепција за идентитетот како нешто што е природно, препознатливо и неоспорно.