Ова во интервјуто за ТВ Франс 24 го кажува вицепремиерот и министер за транспорт Александар Николоски, кој вели дека плановите на земјава за коридорите 8 и 10 ги надминуваат капацитетите на домашната економија и затоа земјава е во потрага по меѓународни партнери кои би инвестирале во инфраструктурните проекти
Северна Македонија бара партнерство со Франција, но и со други европски земји, што би биле слични со договорот влада со влада што земјава го склучи со Велика Британија, за реализација на инфраструктурните проекти на коридорите 8 и 10.
За целите на ваквата економско-политичка офанзива говори вицепремиерот и министер за транспорт Александар Николоски во интервју за ТВ Франс 24 направено за време на неговата неодамнешна работна посета на Франција, а емитувано вчера.
Коридорите 8 и 10, вели Николоски, се економски и стратешки многу важни за Македонија, поради што актуелната влада влегла во голем инвестициски циклус за да ги развива овие проекти, кои предвидуваат изградба на нови автопатишта и брза железница.
Објаснувајќи ги целите на инфраструктурните иницијативи, кои треба да дадат поттик на домашната мобилност, но и поврзувањето со европските патни мрежи, вицепремиерот посочува на географската позиција на земјава и двата паневропски коридори, кои, како што наведува, се сечат неколку километри источно од главниот град на земјава Скопје, што, вели, е уникатен случај во југоисточна Европа.
„Ние имаме уникатна географска позиција. Не е некоја тајна дека Првата и Втората балканска војна се водени поради Македонија. Два паневропски коридори се сечат источно од нашиот главен град – Скопје. Тоа се Коридорот 10, кој е најважниот трговски коридор во Европа. Ги поврзува грчките пристаништа на југ, како пристаништето во Атина и пристаништето во Солун, со Централна и и Северна Европа и го скратува синџирот за набавки за 22 дена доколку пристаништата имаат добра инфраструктура. И вториот коридор е Коридорот 8, кој ги поврзува Јонското и Јадранското Море со Црното Море. НАТО го означи како втор најважен коридор за Алијансата затоа што е алтернативна рута за снабдување на Украина“,
вели вицепремиерот.
Македонија, како што вели тој, сака да ги развива и двата. На Коридорот 10, тој потсетува дека веќе имаме целосна линија на автопатишта, а намерата сега е да се конструира брза железница по која патничките возови ќе се движат со 200 километри на час, а товарните со 100 километри.
„На Коридорот 8 градиме автопат, кој планираме да биде завршен до 2028-2029 година и паралелно со тоа железница“,
додава Николоски.
Ваквите планови, вели тој, ги надминуваат капацитетите на домашната економија и затоа земјава е во потрага по меѓународни партнери кои би инвестирале во инфраструктурните проекти.
Затоа, посочува Николоски, Македонија го потпиша договорот влада со влада со Обединетото Кралство, каде имаме пет милијарди фунти или шест милијарди евра на располагање за вакви проекти.
„Бараме нешто слично и во Франција, таков вид партнерство, како и со други европски земји, исто така“,
вели вицепремиерот и министер за транспорт.
Инаку, на почетокот на интервјуто, прашан дали односите меѓу Скопје и Париз сè уште страдаат бидејќи Франција беше земјата која во 2019 година го блокираше почетокот на преговорите на земјава со Европската Унија, Николоски вели дека времињата сега се сменети.
„Можам да кажам дека соработката е добра, на високо ниво. Оваа посета на Франција зборува многу за тоа што можеме да постигнеме, имавме многу средби на министерско ниво и очекуваме ова да продолжи“,
изјави Николоски во интервјуто.
Меѓу средбите што Николоски ги имаше за време на неговата работна посета на Париз минатата недела беше и онаа со неговиот колега, министерот за транспорт на Франција, Филип Табаро.
Во изјава по средбата, Николоски вели дека со Табаро разговарале за соработка која е доста развиена во делот на авиосообраќајот, потсетувајќи дека двата аеродроми во Скопје и во Охрид се оперираат од француска компанија, но и дека станало збор за зголемување на соработката и во делот на Железницата и автопатиштата.
„Во делот на Железницата ги презентирав нашите планови. Во однос на Коридор 8, кој е од стратешко значење за НАТО, зборувавме што можеме да направиме за да се доврши источниот дел од пругата, но исто така да се развие и западниот дел од пругата, секако да се поврземе и со Италија, Албанија и Бугарија и да ги поврземе Јонското и Јадранското море со Црното Море. Во однос на Коридор 10, зборувавме за тоа што можеме да направиме да изградиме брза пруга и на тој начин јужните пристаништа од Европа да ги споиме со Средна и Централна Европа. Има големи искуства што ќе ги искористиме од Франција, Франција е лидер особено во железничкиот сообраќај и ќе работиме многу заедно“,
вели Николоски во изјавата од 25 јуни.
Претходниот ден, како што додава тој, имале средба со 11 најголеми француски компании, за кои вели дека се добредојдени да инвестираат во Македонија.
Францускиот министер за транспорт, од своја страна, изјави дека посакува соработка со земјава, која освен економска би била и пријателска во насока на спроведување на амбициозните проекти на земјава.
„Целта на денешната средба е да се соработува и на други проекти, пред сè од областа на железничкиот сообраќај, затоа што постојат француски компании кои се развиени и напреднати. Посакуваме соработката со вашата земја, која освен што би била економска, би била пред сè и пријателска во насока на воспоставување заеднички проекти и споделување на нашето искуство за проекти кои биле иницирани пред неколку години, па возобновени, за да ги спроведете амбициозните проекти во вашата земја, која е незаобиколна на Балканот“,
рекол францускиот министер по средбата со својот македонски колега.