Мицкоски нагласи дека е завршена модернизација на застарената и магационирана опрема од Министерствата за внатрешни работи и за одбрана, како што се старите „БТР 70/80“, „хермелини“ и „пинцгауер“

Државата е значително поподготвена да се справи со евентуалните пожари оваа година, за разлика од претходните, вели премиерот Христијан Мицкоски.
Тој истакна дека подготвеноста се должи на повеќе фактори, вклучувајќи ги армиските и полициските хеликоптери, авионите на Дирекцијата за заштита и спасување, како и модернизацијата на застарена воена опрема.
„За разлика од претходните години, оваа година сме многу, многу поподготвени“,
рече Мицкоски.
Тој најави дека се очекува пристигнување на третиот авион на Дирекцијата за заштита и спасување кој беше на сервисирање.
Мицкоски нагласи дека е завршена модернизација на застарената и магационирана опрема од Министерствата за внатрешни работи и за одбрана, како што се старите „БТР 70/80“, „хермелини“ и „пинцгауер“.
„Она што ќе биде приоритет е тоа што дел од застарената и магационирана опрема се модернизираа, обработија, им се инсталираа посебни резервоари за вода, се купија пумпи што работат на висок притисок и можат да пристапуваат на непристапни терени“,
објасни Мицкоски.
Целта на оваа иницијатива, како што рече тој, е да се овозможи пристап до непристапни терени и гаснење на пожарите во текот на ноќта, кога огнот е помалку активен, со цел да се спречи негово разгорување преку ден.
Премиерот најави дека многу скоро ќе се одржи показна вежба за да се демонстрира ефективноста на овие модернизирани возила. Се очекува да бидат подготвени 50 до 60 вакви возила, опремени со резервоари за вода до шест кубни метри.
„Очекувам подготвени да ги дочекаме пожарите и драматично сме поподготвени од претходно“,
додаде Мицкоски.
На прашањето за трошоците, премиерот истакна дека целиот проект е реализиран со минимални финансиски средства.
„Многу малку. Тоа е пред сè работа која е завршена на волонтерска база и со општествено одговорни компании. Буџетот не го чини воопшто“,
изјави Мицкоски.
Во однос на пожарите, денеска од ЦУК информираа дека во текот на вчерашниот ден на територијата на државата имало вкупно 20 пожари на отворен простор, од кои два сè уште се активни.
Денеска од Дирекцијата за заштита и спасување информираа дека годинава повторно се ангажирани пензионираните пилоти на „ертракторите“, со што авионите на Дирекцијата ќе бидат оперативни за гаснење на пожарите на отворено.
И од ДЗС потврдија дека наскоро се очекува да биде вратен вториот авион на ДЗС од редовниот сервис во Австрија.