Од Дирекцијата, исто така, велат дека вториот авион на ДЗС се очекува за кратко време да биде вратен од редовниот сервис во Австрија
Двајцата пензионирани пилоти на „ертракторите“ од вчера повторно се на располагање на Дирекцијата за заштита и спасување (ДЗС) откако потпишаа договор за ангажман со институцијата.
Од ДЗС велат дека со ангажирањето на пилотите авионите на Дирекцијата ќе бидат оперативни за гаснење на пожарите на отворено.
„В.д. директорот на Дирекцијата за заштита и спасување, Стојанче Ангелов, вчера потпиша договор за ангажман на двата пензионирани пилота за противпожарни авиони ’ертрактор’, Стоје Арсовски и Васко Михалчев“,
информираа денеска од ДЗС.
Од Дирекцијата, исто така, велат дека вториот авион на ДЗС се очекува за кратко време да биде вратен од редовниот сервис во Австрија.
Инаку, двајцата пензионирани пилоти на „ертракторите“ и минатата година беа ангажирани да интервенираат во гасење на пожарите.
Минатата година Ангелов, кој тогаш беше директор во Центарот за управување со кризи (ЦУК), рече дека државата располага со четири функционални хеликоптери за гаснење пожари, од кои три се во рамки на МВР и еден на Армијата, како и три „ертрактори“ на Дирекцијата за заштита и спасување – ДЗС, но тие беа нефункционални. Причина за тоа беше што двајца пилоти заминале во пензија, а имало само еден активен пилот и во таква ситуација авионите не смееле да летаат.
Во однос на пожарите, денеска од ЦУК информираа дека во текот на вчерашниот ден на територијата на државата имало вкупно 20 пожари на отворен простор, од кои два сè уште се активни.