На објавата на претседателката на Европската комисија реагираше унгарскиот премиер Виктор Орбан, кој ја повика ЕК да се воздржи од, како што рече, мешање во спроведување на законите на земјите членки каде што нема никаква улога
Претседателката на Европската комисија, Урсула фон дер Лајен, ги повика властите во Унгарија да ја повлечат забраната и да го дозволат одржувањето на Парадата на гордоста без се воведуваат казни за организаторите или учесниците на маршот. Шефицата на ЕК порача дека еднаквоста и недискриминацијата се основни вредности вградени во договорите на ЕУ кои мора да се почитуваат во секое време од секоја земја членка.
„Ги повикувам унгарските власти да дозволат Парадата на гордоста во Будимпешта да продолжи без страв од какви било кривични или административни санкции против организаторите или учесниците“,
рече Фон фер Лајен во видеопорака објавена на својот профил на Икс.
До припадниците на ЛГБТИ-заедницата во Унгарија и пошироко, претседателката на ЕК упати зборови на поддршка, уверувајќи ги дека секогаш ќе биде нивен сојузник.
„Имате причина да бидете горди, Европа е посилна и побогата заради вас. Јас сум на ваша страна, денес и секогаш“,
додаде Фон дер Лајен.
I call on the Hungarian authorities to allow the Budapest Pride to go ahead.
— Ursula von der Leyen (@vonderleyen) June 25, 2025
Without fear of any criminal or administrative sanctions against the organisers or participants.
To the LGBTIQ+ community in Hungary and beyond:
I will always be your ally. pic.twitter.com/Wz0GBFRz8C
На објавата на Фон дер Лајен, реагираше унгарскиот премиер Виктор Орбан, кој ја повика ЕК да се воздржи од, како што рече, мешање во спроведување на законите на земјите членки каде што нема никаква улога.
„Исто така, ја повикувам Комисијата да ги фокусира своите напори на итни предизвици со кои се соочува Европската Унија – области каде што има јасна улога и одговорност и каде што направи сериозни грешки во последните години, како што се енергетската криза и ерозијата на европската конкурентност“,
напиша Орбан во објава на Икс.
Dear Madam President,
— Orbán Viktor (@PM_ViktorOrban) June 25, 2025
I urge the European Commission to refrain from interfering in the law enforcement affairs of Member States, where it has no role to play.
I also call on the Commission to focus its efforts on the pressing challenges facing the European Union—areas where it… https://t.co/QHlJofeC6F
Откако неколку членови на Европскиот парламент изјавија дека ќе присуствуваат на маршот, Унгарија ги предупреди амбасадорите од земјите од ЕУ и нивниот персонал да не присуствуваат на Парадата на гордоста која треба да се одржи во сабота во Будимпешта, велејќи дека полицијата го забранила собирот.
Во април годинава парламентот на Унгарија усвои амандман на уставот на земјата со кој се забрануваат јавни настани организирани од ЛГБТИ-заедницата.