Набљудувачката организација предупредува дека при очекуван тесен изборен резултат секоја неправилност може да влијае врз исходот. Притисоци врз избирачи, членови на избирачки одбори и набљудувачи се забележани на 29 отсто од гласачките места
До 16 часот на предвремените парламентарни избори во Србија гласале 56,4 отсто од избирачите, покажува најновата процена на набљудувачката организација ЦРТА. Тоа е за 14,3 процентни поени повеќе отколку до истиот час на изборите во 2023 година, кога излезноста изнесувала 42,1 отсто. Маргината на грешка на процената е ±0,9 процентни поени.
Покрај високата излезност, ЦРТА известува за голем број неправилности и за сè повеќе насилни инциденти надвор од гласачките места.
Според организацијата, на 29 отсто од набљудуваните гласачки места се регистрирани притисоци врз избирачи, членови на избирачки одбори и набљудувачи, а на 18 отсто – процедурални пропусти.
Фотографирање гласачки ливчиња е забележано на дури 40 отсто од гласачките места, непочитување на обврската за користење УВ-ламба на 21 отсто, а гласање без важечки документи за идентификација на шест отсто.
ЦРТА наведува и случаи на заплашување и лажно претставување пред нејзини набљудувачи. Во Земун бил заплашуван набљудувач на организацијата, додека во Крагуевац непознато лице лажно се претставило како член на нејзиниот правен тим.
„Дури и помалку сериозните неправилности може да имаат големо значење во ситуација кога се очекува многу тесен изборен резултат“, предупредува ЦРТА.
Набљудувачката мисија ги повика политичките актери и граѓаните да придонесат за намалување на тензиите и да се воздржат од сите форми на насилство.
Висока излезност беше забележана уште претпладне. Според процената на ЦРТА, до 10 часот гласале 19,8 отсто од избирачите, наспроти 9,8 отсто во истиот период на изборите во 2023 година. Во претходното соопштение организацијата извести за фотографирање ливчиња на четвртина од гласачките места и за полициска пријава во Ветерник поради сомневање за купување гласови и „бугарски воз“.
Во Србија денеска се избираат 250 пратеници во парламентот, а гласачките места се отворени до 20 часот. Следната прес-конференција на ЦРТА е закажана за 20:15 часот.