Иранскиот министер за надворешни работи нагласи дека е апсолутно подготвен за договорено решение во врска со нуклеарната програма
Министерот за надворешни работи на Иран, Абас Арагчи, изјави дека неговата земја не може да преговара со САД додека нејзиниот народ е бомбардиран. Тој, исто така, тврди дека САД се вклучени во агресијата од првиот ден, иако не доставил никакви докази за ова, пишува Би-би-си.
Во разговор со новинарите во Истанбул, каде што ги продолжува дипломатските разговори, Арагчи предупреди дека вклучувањето на САД во конфликтот меѓу Израел и Иран би било многу опасно.
Претходно оваа недела американскиот претседател Доналд Трамп ги одобри плановите за напад на Иран, но се откажа со надеж дека Иран ќе се согласи да се откаже од својата нуклеарна програма.
Иранскиот министер за надворешни работи нагласи дека е апсолутно подготвен за договорено решение во врска со нуклеарната програма. Во 2015 година Иран потпиша долгорочен договор за својата нуклеарна програма со група светски сили, по години тензии поради сомневања дека се обидува да развие нуклеарно оружје.
„Дипломатијата функционираше во минатото и може повторно да функционира. Но, за да се вратиме на дипломатијата, агресијата мора да престане“,
потенцира Арагчи.