Покажувајќи документи, со кои рече дека се докажува уплатата на донации од страна на фирмата на сопругата на началникот на СВР Штип на сметка на партијата, Кузеска праша и дали овие пари од газда Деко од „Пулс“ завршувале за финансирање на кампањите на ВМРО-ДПМНЕ
Дали фирмата на сопругата на началникот на Секторот за внатрешни работи (СВР) Штип служела како параван за прибирање рекет од локалите што биле изоставени од контрола на полицијата, каков што е примерот со т.н. дискотека „Пулс“ во Кочани, прашуваат денеска од Социјалдемократскиот сојуз (СДСМ).
На денешната прес-конференција, портпаролката на партијата Богданка Кузеска го отвори ова прашање, истовремено посочувајќи дека државата се соочува со најголемата измама и обид за затскривање на вистината за трагедијата што во март се случи во Кочани, кога загинаа 62 лица, а над 200 се повредени.
Во тој контекст, таа рече дека станува јасно оти партијата на власт ВМРО-ДПМНЕ и премиерот Христијан Мицкоски немаат намера да работат во корист на правдата, ниту пак, да спроведат неселективна правда.
Кузеска се повика на јавно достапните податоци на Заводот за ревизија во списокот на донатори на политичките партии, каде како донатор на ВМРО-ДПМНЕ во кампањите во 2020, 2021 и 2024 година се сретнува компанијата „Салтировски консалтинг“ ДООЕЛ увоз-извоз Делчево.
„Сопственик на фирмата е Анита Салтировска, сопругата на началникот на СВР Штип, Дејан Салтировски. Освен донации од фирмата ‘Салтировски консалтинг‘ ДООЕЛ увоз-извоз Делчево на списокот на донатори може да се најде и името на сопругата на началникот на СВР Штип Дејан Салтировски, Анита која освен донации преку компанијата, вршела уплата на донации и од свое лично име“,
рече Кузеска.
Покажувајќи документи, со кои рече дека се докажува уплатата на донации од страна на фирмата на сопругата на началникот на СВР Штип на сметка на партијата, Кузеска постави уште неколку прашања:
„Дали оваа компанија водела фиктивно сметководство за компаниите ‘Класик‘ ДООЕЛ и ‘ММММ‘ ДООЕЛ кои управувале со дискотеката ‘Пулс‘ на газда Деко, дали со транши од Деко на ‘Салтировски консалтинг‘ ДООЕЛ од Делчево се исплаќал договорениот паушал за полициска заштита на ‘Пулс‘, дали ‘Салтировски консалтинг‘ ДООЕЛ била вмешана и во скандалот ‘Делчевски Ниви‘ кој магично исчезна од судските процеси и дали овие пари од Деко завршувале за финансирање на кампањите на ВМРО-ДПМНЕ“.
Според неа, ако се тргнат канџите на Мицкоски од Обвинителството, одговорноста за работењето на дискотеката „Пулс“ ќе укаже директно на највисокото раководство на ВМРО-ДПМНЕ.
„Мицкоски треба да објасни, до кога мисли да врши притисок врз обвинителите со надеж дека ќе ја сокрие вистината“,
рече Кузеска.
На крајот од прес-конференцијата таа упати и едно, како што рече, потсетување до Мицкоски за мудрост од неговиот претходник, а тоа е дека вистината е како шило, врти, врти и на крајот ќе излезе.
Изминатиот период опозицијата бара оставки и одговорност од министерот за внатрешни работи Панче Тошковски и директорот на Бирото за јавна безбедност (БЈБ) Александар Јанев во врска со пожарот во т.н. кабаре „Пулс“ во Кочани.
Повиците за оставки и одговорност за раководството на МВР доаѓаат откако Обвинителството за гонење на организиран криминал и корупција (ОЈО ГОКК) ја прошири истрагата со уште 13 актуелни полициски службеници и началници кои кобната вечер вршеле акциска контрола во „Пулс“.
Тие се осомничени дека во период од 14 до 16 март 2025 година сториле кривично дело тешки дела против општата сигурност.