Од партијата на Али Ахмети досега во неколку наврати излегоа со обвинувања за дискриминација и маргинализирање на Албанците од страна на актуелната власт
Опозициската Демократска унија за интеграција (ДУИ) повторно обвини дека актуелната власт врши дискриминација и во континуитет ја занемарува употребата на албанскиот јазик во официјалната комуникација што, според партијата, е во спротивност со Охридскиот рамковен договор и Законот за употреба на јазиците.
Според партијата од Мала Речица, еднаквата употреба на службените јазици не е техничко прашање или политичка желба, туку законска обврска, вредност на соживотот и основа на демократскиот поредок.
Ваквата ситуација, оттаму ја аргументираат со недостаток на преведени содржини на албански јазик на официјалните веб-страници на институциите со што, како што велат, на граѓаните Албанци им се ускратува правото на еднаков пристап до информациите.
„Долго време албанските граѓани се чувствуваат исклучени од правото на еднаков пристап до јавните информации што произлегуваат од државните институции. Недостигот на албански јазик, преводи, задоцнети ажурирања и непотполни официјални веб-страници на албански јазик се јасен доказ за исклучувачки пристап што е спротивен на духот на Охридскиот договор и Законот за употреба на јазиците“,
се вели во соопштението на ДУИ.
Уште позагрижувачки, според опозициската партија, е што тоа што Владата има селективна постапка кон оваа тема.
„За други теми Владата реагира и информира, но кога станува збор за албанскиот јазик, одговорот е молк и игнорирање. Ова не е недостаток на капацитет, туку недостаток на волја“,
велат од ДУИ.
Според партијата на Али Ахмети неспроведувањето на Законот за јазиците не е само прекршување на законот, „туку и удар врз достоинството на албанските граѓани и го поткопува нивната доверба во институциите на државата“.
Јазичните права, велат од ДУИ, не се симболика, туку неразделив дел од граѓанските права.
„Ги повикуваме институциите албанскиот јазик да го гледаат како заедничко богатство и обврска што ја зајакнува единственоста на државата. Еднаквоста, инклузијата и транспарентноста не смеат да останат само празни флоскули, тие мора да се видат и почувствуваат во секојдневниот живот на секој граѓанин“,
се наведува во соопштението.
Пораката што оттаму ја испраќаат до актуелната влада е дека ако таа не подготвена да почитува еден од клучните столбови на нејзиното законско и уставно функционирање, тогаш го изгубила моралното право да води мултиетничка и европска држава.
„ДУИ внимателно ќе го следи овој процес и ќе бара институционална одговорност за овој дискриминаторски пристап“,
порачуваат од опозициската партија.
Од партијата на Али Ахмети досега во неколку наврати излегоа со обвинувања за дискриминација и маргинализирање на Албанците од страна на актуелната власт.
Овие појави, според ДУИ, се случуваат во време кога, според партијата, се прават обиди да се доведат во прашање клучните одредби од Законот за јазиците пред Уставниот суд.