Американски високи функционери за новинската агенција изјавиле дека Израелците во нивните контакти со Вашингтон пријавиле дека имале можност да го убијат врховниот лидер на Иран, но Трамп ги убедил да се откажат од планот
Американскиот претседател Доналд Трамп не дал зелено светло за израелскиот план за атентат врз врховниот лидер на Иран, ајатолахот Али Хамнеи.
Ова за новинската агенција Ројтерс денеска го изјавиле двајца американски функционери, под услов да останат анонимни.
„Дали Иранците убија Американец? Не. Додека не го сторат тоа, не можеме да зборуваме за напад врз политичкото раководство (на Иран)“,
рекол еден од изворите, инаку висок функционер на американската админстрација.
Двата извори рекле дека високи американски функционери биле во постајана комуникација со официјални претставници на Израел во деновите откако Тел Авив го започна масовниот напад врз Иран со образложени дека сака да ја запре нуклеарната програма на Техеран..
Според американските функционери, Израелците пријавиле дека имале можност да го убијат врховниот лидер на Иран, но Трамп ги убедил да се откажат од планот.
Тие не кажале дали американскиот претседател самиот ја пренел пораката, но навеле дека Трамп често комуницирал со израелскиот премиер Бенјамин Нетанјаху.
Прашан за наводите на Ројтерс, израелскиот премиер денеска во интервју за телевизијата Фокс њуз рекол дека не сака да навлегува во тоа, бидејќи, како што навел, имало многу лажни извештаи за разговори што никогаш не се случиле.
„Но, можам да ви кажам, мислам дека го правиме она што треба и ќе го направиме она што треба. И мислам дека САД знаат што е добро за САД“,
рекол Нетанјаху.
Инаку, американскиот претседател Доналд Трамп во објава на неговата социјална мрежа Трут соушл денеска напиша оти верува дека Израел и Иран наскоро ќе постигнат мировен договор, наведувајќи дека се во тек бројни повици и состаноци со цел да не се дозволи ескалација на ситуацијата на Блискиот Исток.
„Иран и Израел треба да постигнат договор и ќе постигнат. Исто како што посредував за мир меѓу Индија и Пакистан користејќи ја трговијата со САД за да внесам разум, кохезија и трезвеност во преговорите“,
напиша американскиот претседател.
Во објавата тој потсети и на ситуацијата со Србија и Косово за време на својот прв мандат.
„Србија и Косово беа на работ на војна тогаш, како што честопати биле со децении. Јас го спречив тоа. Бајден уништи сè на долг рок со глупави одлуки, но повторно ќе ги поправам работите“,
вели Трамп.
Во краток коментар на објавата на американскиот претседател, британскиот национален сервис Би-би-си потсетува на заложбите на Трамп за ставање крај на војната меѓу Руссија и Украина, кои досега не вродија со плод.