Владината портпаролка Марија Митева соопшти дека линијата ќе биде достапна 24 часа на ден со која ќе се обезбеди персонализирана поддршка за сите повредени лица и нивните семејства
Од понеделник Владата на повредените од Кочани им става на располагање нова телефонска линија – 070 355 526, преку која во директна комуникација ќе се обезбеди персонализирана поддршка за повредените лица од трагедијата во Кочани и нивните семејства.
Оваа иницијатива, како што рече портпаролката Митева, не е донесена во институционална изолација, туку е резултат на теренска работа и директни средби со засегнатите. Дополнително, рече оти работната група за евалуација на повредените изминатиот период била во постојан контакт со семејствата и медицинските тимови.
„Во првата фаза, ги повикуваме сите повредени и нивните семејства да се јават, да ги изнесат своите барања кои ги имаат, предлози и конкретни потреби. Оваа линија нема да биде само контакт – туку жив канал на комуникација, преку кој ќе се одржува дневна, неделна и месечна координација, со редовно информирање и со персонализиран пристап за секој случај“,
рече Митева.
Таа вели и дека Владата смета оти поддршката за настраданите и повредените не смее да биде еднократна и оти таа е процес бидејќи здравствената и психолошката состојба на повредените се менува секојдневно и оти им било потребно време да се посветат на закрепнувањето.
„Кога се во состојба на закрепнување и имаат нови барања и потреби, ние сме целосно подготвени да им излеземе во пресрет за сите останати состојби со структуриран, отворен и достапен механизам“,
заклучи Митева.