Собирот е закажан за утре напладне пред резиденцијата на поглаварот на МПЦ-ОА во Скопје. Организаторите велат дека црквата е народот, а народот има свој кандидат за митрополит во Дебарско-кичевската епархија, а тоа е епископот Антаниски Партениј
Православни верници од повеќе епархии за утре најавуваат протест поради начинот на избор на новиот митрополит на Дебарско-кичевската епархија. Порталот „Религија.мк“ вчера објави дека новоизбраниот монах Георгиј е предлогот на архиепископот Стефан за митрополит на оваа епархија.
Според најавите, собирот под мотото ,,Гласот на народот – глас на Бога”, е закажан за утре во 12 часот пред резиденцијата на поглаварот на МПЦ-ОА во месноста Криви Дол во Скопје, во близина на Скопското кале.
Организаторите на протестот велат дека црквата е народот, а народот има свој кандидат за митрополит во Дебарско-кичевската епархија, а тоа е епископот Антаниски Партениј.
„Верниците на МПЦ-ОА од неколку градови во Македонија организираат мирен собир со цел поддршка за предлог на епископ Партениј како кандидат за митрополит на Дебарско-кичевската епархија, но и поради начинот на избор на нов митрополит на Дебарско-кичевската епархија. Верниците се зачудени како архиепископот со еден кандидат како предлог се одржува избор?! Избор! Меѓутоа, за да има избор, треба да предложите повеќе кандидати!? Избор со еден кандидат е парадокс, а тој кандидат не е викарниот епископ Антаниски со 30 години монашко искуство! Црквата е народот, без народ нема ни Црква!“,
се наведува во соопштението со кое се најавува утрешниот протест на православните верници.
Порталот „Религија.мк“ вчера објави дека новоизбраниот монах Георгиј е предлогот на архиепископот Стефан за избор на нов митрополит на Дебарско-кичевската епархија при МПЦ-ОА. Архиепископот вчера го испратил предлогот до членовите на Синодот на МПЦ-ОА, а седницата за избор на нов митрополит ја закажал за 12 јуни.
Претходно денеска со став во врска со предлогот за нов дебарско-кичевски митрополит излезе и универзитетскиот професор и поранешен пратеник Александар Спасеновски. Реагира дека изборот се врши на нетранспарентен начин во, како што вели, крајно чудна постапка.