Директорката на ИЈЗ, Марија Андоновска, нагласи дека едниот пациент е хоспитализиран на Инфективната клиника во Скопје, а другиот пациент сè уште не е хоспитализиран
Двајцата пациенти кај кои лабораториски е потврдено присуство на мајмунски сипаници се од Скопје. Станува збор за мажи родени 1981 и 1985 година, односно за лица на возраст од 44 и 40 години. Двата случаи, како што изјави директорката на Инситутот за јавно здравје, Марија Андоновска, не се меѓусебно поврзани.
Според податоците што ги дале, не патувале никаде надвор од државата.
Андоновска нагласи дека едниот пациент е хоспитализиран на Инфективната клиника во Скопје, а според нејзините информации, другиот пациент сè уште не е хоспитализиран.
На денешната прес-конференција во Министерството за здравство се обрати и заменик-министерот Јовица Андоновски, кој најави дека во врска со новонастанатата состојба попладнево ќе заседава Комисијата за заразни болести. Апелира граѓаните да не паничат оти како што рече, се преземаат сите потребни мерки.
ИЈЗ синоќа информира дека лабораториски се потврдени првите два случаи на мајмунски сипаници во земјава.