Одговарајќи на прашања по денешниот брифинг со новинарите, собранискиот спикер рече дека Собранието засега е во статус кво во однос на потенцијална нова распределба на пратениците, а оти таа останува онаква каква што била во моментот на конституирање на актуелниот парламентарен состав
И покрај превирањата во владејачката коалиција ВЛЕН, собранискиот претседател Африм Гаши вели дека во моментов нема нова распределба на пратениците во законодавниот дом.
Одговарајќи на прашања по денешниот брифинг со новинарите, Гаши рече дека Собранието засега е во статус кво во однос на потенцијална нова распределба на пратениците, а оти таа останува онаква каква што била во моментот на конституирање на актуелниот парламентарен состав.
„Сите пратенички групи кои се формирале на почетокот на овој нов собраниски состав продолжуваат да работат. Во моментов немаме нова ситуација во однос на прераспределба на пратеници во други групи. Ако имаме нови промени ќе треба тоа официјално да го достават до службите и до мене, за да ги информирам потоа другите пратенички групи и пратенци“,
изјави Гаши одговарајќи на новинарски прашања.
Во врска со евентуалното излегување на Алијанса за Албанците од Владата, претходно денеска министерот за здравство Арбен Таравари рече дека тоа би се случило само доколку премиерот смета дека се непотребни. Рече дека премиерот е тој што ја формира Владата и оти никој друг нема право да кажува освен него.
Изјавата на Таравари уследи откако првиот вицепремиер и министер за животна средина Изет Меџити во неколку наврати го повика да одлучи дали ќе соработува со ДУИ или ќе ја продолжи соработката со ВЛЕН.
До ваквата нерамнотежа во ВЛЕН дојде откако Таравари одлучи Алијанса за Албанците да настапи со самостојни листи за градоначалници и советници на локалните избори, додека останатите три партии во коалицијата договорија заеднички настап на изборите и најавија обединување во нов политички субјект.