Повтори и дека Европската комисија обезбедила препораки во извештајот за земјата, за владеењето на правото и Судскиот совет, кои се вклучени во Реформската агенда, за која според него, има и конкретни рокови и цели, а се неопходни и финансиски средства за исполнување на планот за патот кон Европа
Корупцијата е голем предизвик за државата. Потребна е забрзана промена за постигнување на реформите, рече денеска на Конститутивната седница на Меѓуресорското тело за координација на активностите против корупцијата, амбасадорот на Европската Унија во земјава, Михалис Рокас.
Според него, борбата против корупцијата е клучна за напредокот на државата кон Европа и потребна е забрзана промена за да се постигнат поставените реформи.
„Корупцијата продолжува да биде предизвик. Таа длабоко навлегува во порите на општеството и на граѓаните. Имаме и заложби за борба против корупцијата, што е напредок кон Европа. Претходните влади се бореа против корупцијата, но тоа е задача на целокупното општество. Секоја институција, секој граѓанин има своја улога. Реформите бараат промена на менталниот склоп во рамките на институциите, во рамките на правниот систем и во менталниот склоп на поединците“,
рече тој.
Повтори и дека Европската комисија обезбедила препораки во извештајот за земјата, за владеењето на правото и Судскиот совет, кои се вклучени во Реформската агенда, за која, според него, има и конкретни рокови и цели, а се неопходни и финансиски средства за исполнување на планот за патот кон Европа.
„Потребен е поголем напредок за да го зајакнеме владеењето на правото и да воведеме нови законски основи како што е новиот Кривичен закон. Гледаме охрабрувачки знаци за активности преземени во однос на истражни постапки, апсења и правосудни пресуди. Исто така и во одземање на нелегално стекнат имот. Но, важно е судовите, правосудните органи и полицијата да ги преземат своите одговорности, а правосудните власти мора да бидат соодветно финансирани за тоа. Државниот буџет мора да вклучува финасиски средства што ќе бидат предвидени во одредени законски акти“,
посочи Рокас.
Независното судство и регулаторните тела, како што додаде, бараат и надзор што може да се обезбеди преку финансиска независност во една глобална рамка.
„Независноста во судството може да се гарантира не само преку финансиска независност, туку и со отсуство на злоупотреба на службенитее должности. Мора да престане мешањето во работата на судовите и правосудните органи и тоа да не се прави за политички цели“,
кажа евроамбасадорот.
Заменик-амбасадорката на САД, Никол Варнес, смета дека борбата против корупцијата е суштинска за економскиот развој и социјалната доверба.
За шефот на Мисијата на ОБСЕ во Скопје, Килијан Вал, транспарентноста и спроведувањето на законите се клучни за успешна борна против корупцијата.
Во Владатата денеска беше конституирано Меѓуресорско тело за координација на активностите против корупцијата, кое има одговорност да воспостави координација меѓу сите клучни институции за борба против корупцијата.