„Барам само да ги прекине преговорите со ДУИ. Нема смисла да води преговори со ДУИ и да биде дел од ВЛЕН. Изјавите дека ако не се договори со ВЛЕН дека ќе оди сам, а некаде ќе соработува со ДУИ, некаде со ВЛЕН – тоа го нема во политичката теорија, а не, пак, во пракса. Тоа нема никаква смисла. Затоа барам со неговите партиски тела да ги преиспита овие одлуки и да бидеме на чисто“, вели Меџити
Таравари треба да пресече – дали е дел од ВЛЕН или е во преговори со ДУИ и Ахмети. И едното и другото не може. Ова денеска го побара лидерот на Демократско движење Изет Меџити од неговиот коалициски колега во ВЛЕН, Арбен Таравари, по информациите дека тој е во комуникација со Демократската унија за интеграција.
„Преговори со ДУИ значи дека може да испорача фактори од таму и тогаш ќе се коси со политиките на Владата. И јас и тој сме избегале од ДУИ, кое не беше до ова дереџе и сега ДУИ што е на црните листи, со пола претседателство затворено за корупција, соработката со нив значи дека утре или задутре ќе треба да се испорачаат и фактори од таму оти тие ќе имаат некои барања“,
рече Меџити одговарајќи на новинарски прашања на денешната прес-конференција во Владата.
На прашањето дали е можна нова распределба на ресорите во Владата, бидејќи очигледно дека нема проблем во владината коалиција, туку меѓу ВЛЕН и Таравари кој има пет пратеници, Меџити истакна дека е тоа прашање што треба да се упати до Таравари и додаде дека него го гледаат како дел од ВЛЕН. На инсистирање да одговори на тоа дали е прифатлива за ВЛЕН можноста Таравари да излезе од коалицијата, а да остане во Владата, тој повтори дека очекуваат прво да одговори Таравари, а потоа тие ќе се произнесат.
„Барам само да ги прекине преговорите со ДУИ. Нема смисла да води преговори со ДУИ и да биде дел од ВЛЕН. Изјавите дека ако не се договори со ВЛЕН, дека ќе оди сам, а некаде ќе соработува со ДУИ, некаде со ВЛЕН – тоа го нема во политичката теорија, а не пак во пракса. Тоа значи пример во Сарај ќе се тепаме за избори, во друга општина да барам од членството да го поддржат Таравари. Тоа нема никаква смисла. Затоа барам со неговите партиски тела да ги преиспита овие одлуки и да бидеме на чисто. Имаме владина програма, важни проекти и што побрзо треба да се затворат овие дилеми“,
рече Меџити.
На новинарско прашање како ги коментира изјавите на Таравари дека токму тој има постојана комуникација со двајца експоненти од ДУИ, Меџити рече дека треба да се направи разлика меѓу комуникација и политички преговори.
Тој рече дека во Собранието може да има комуникација и со Муса Џафери, Фатмир Дехари, и со некој пратеник од Левица или СДСМ. На крајот, како што рече Меџити, ние не водиме војна, туку водиме политички битки и концепти.
Во однос на барањата на Таравари на локалните избори ВЛЕН да одат со посебни советнички листи, Меџити рече дека предлогот бил надгласан од четирите субјекти во коалицијата.
„Неговиот предлог беше да се оди со посебни листи, но беше надгласан. Во изминатите години имало многу коалиции, но никогаш не се случило во Влада да се заедно, а на локални избори да одат со посебни листи и да се поделат. Тоа веќе не е во функција и не е во интерес на ВЛЕН туку оди во прилог на друга политичка партија. Но, тоа не значи дека за други идеи може да гласаме и поинаку. Некаде нема да се согласувам со Касами, некаде со Ибраими, тоа е дел од демократијата, се вадат аргументите на маса и се гласа и кога ќе бидеш надгласан се почитува концептот што преовладува“,
одговори Меџити.
За тоа кога ќе почне спојувањето на ВЛЕН во една партија, Меџити рече дека таа идеја е од самиот почеток и оти чекале соодветен момент за усогласување на структурите, идеите, програмите.
„Овој процес на спојување, делумно, го почнавме лани. Ние имаме кадровска комисија која се составува од Таравари и сите три други субјекти. Исто така организирањето на ПР е заедничко – значи дека е почнато спојувањето на ВЛЕН. Но, ако Таравари мисли дека може да има две опции за да се излезе со јасна визија, ние мислиме дека е време да одиме кон унифицирање, кон градење на ВЛЕН како еден субјект“,
рече лидерот на Демократско движење.
Во однос на тоа кој ќе биде лидер на ВЛЕН, Меџити вели дека е најмалку значајно и оти распределбата на раководните функции ќе ги остават на процесот и органите.
Лидерот на крилото на Алијанса за Албанците, Арбен Таравари, вчера рече дека не добил понуда од другите партии во ВЛЕН за да се спојат во еден политички субјект. Прашан дали ова значи дека се поблиску до преговори со ДУИ, тој негираше. Тој рече дека се отворени за соработка со сите партии и оти од ВЛЕН добил ултиматум, а не можност да разговараат.
Односите меѓу Арбен Таравари и лидерите на другите партии што се дел од ВЛЕН, коалицијата која е дел од владејачкото мнозинство, се заострени во изминатиот период, а главна точка на конфликт е заедничкиот настап на претстојните локални избори.
Таравари, во неодамнешен настап во емисијата „360 степени“, јавно го критикуваше функционирањето на коалицијата и нивната ефикасност во Владата. Отиде дотаму што кажа и дека дел од директорските, па и министерските позиции, не се пополнети со соодветни кадри. Тоа само ги засили шпекулациите дека не се во прашање само локалните избори, туку дека е можен распад на коалицијата на партии на Албанците кои се во Владата. Па дури и дека Таравари договара соработка со ДУИ.