Претседателот на Република Српска, Милорад Додик, денеска објави дека Ана Лирман кришум дошла во Бања Лука и ја повика полицијата „засекогаш да ја протера од земјата“
Владата на Република Српска ја прогласи за персона нон грата германската министерка за европски прашања и клима, Ана Лирман, откако Германија воведе санкции за највисоките функционери на овој ентитет на БиХ.
Претседателот на Република Српска, Милорад Додик, денеска објави дека Лирман кришум дошла во Бања Лука и ја повика полицијата „засекогаш да ја протера од земјата“.
„Како и секој непожелен посетител, германската министерка Ана Лирман дошла во Бања Лука кришум за да се сретне со своите пулени. На што се сведе некогаш моќната Германија? Очекувам дека полицијата на Република Српска ќе ја испрати засекогаш од Република Српска“,
напиша Додик во објава на Икс.
Доаѓањето на германската министерка тамошната влада го оцени за директно мешање во внатрешните работи и кршење на меѓународните конвенции, додавајќи дека против неа ќе бидат воведени реципрочни мерки.
„Со цел да го заштити политичкиот и институционалниот интегритет на Република Српска, Владата воведува реципрочни мерки, кои претставуваат пропорционален и легитимен одговор во согласност со меѓународните практики, и ја прогласува г-ѓа Ана Лирман за персона нон грата во Република Српска“,
се наведува во соопштението на владата на овој ентитет на БиХ.
Се додава дека владата го изразува својот протест против едностраните и политички мотивирани мерки кои, како што се наведува, без транспарентна правна основа и со непочитување на принципот на непристрасност, биле преземени од страна на одредени функционери на Германија, меѓу кои и министерката Ана Лирман.