Според полицијата на возачот С.К. му е издаден платен налог, а дел од медиумите објавија и дека возилото е сопственост на политичар, поранешен министер и амбасадор
Министерството за внатрешни работи (МВР) денеска ги демантира објавите на социјалните мрежи и во дел од медиумите дека непрописно паркираното возилото во скопско Дебар Маало е на полициски службеник. Велат дека настанот од видеото се случил на 22 март годинава, а дека возачот е санкциониран.
„Возилото е подигнато од страна на ПОЦ, а од страна СВР Скопје се преземени мерки по Законот за безбедност на сообраќајот на патиштата. На возачот С.К. му е издаден платен налог“,
се вели во соопштението на МВР.
Оттаму посочија и дека во врска со постапувањето на полициските службеници при подигнувањето на возилото веќе постапува Одделот за внатрешна контрола, криминалистички истраги и професионални стандарди при МВР.
„По завршување на целокупната постапка соодветно ќе ја известиме јавноста“,
информира полицијата.
На видеото објавено на социјалните мрежи се гледа како неколку граѓани се обидуваат да издејствуваат пајак-службата да го отстрани непрописно паркираното возило марка „порше“ паркирано на велосипедската патека пред ресторан во скопско Дебар Маало.
Настанот е проследен со неколкуминутна расправија на неколку граѓани со вработените во пајак-службата на Паркинзи на Општина Центар (ПОЦ) и со полицаецот, кој е нивна придружба.
Според видеото, вработените во пајак-службата не го подигаат возилото веднаш и им велат на граѓаните дека чекаат налог од полицаецот, зашто станува збор за службено возило, односно дека е на полицаец што е на должност.
По неколку минути, полицаецот им вели на вработените во пајак-службата да го дигнат возилото.
И градоначалникот на Општина Центар, Горан Герасимовски, се огласи за случајот со непрописно паркираното возило во Дебар Маало. Смета дека се крајно некоректни и манипулативни обидите од некои медиуми да се префрли одговорноста на пајак-службата на ПОЦ, за која посочи дека професионално си ја врши работата.
„Отстранувањето на непрописно паркираните возила е по налог на службено овластено лице. Во случајов нашите вработени воопшто не го стопираат кревањето, едноставно чекаат налог од страна на службено лице, полицаец. По неговото добивање, веднаш постапуваат и го креваат возилото. И во самото видео објавено на социјалните мрежи се гледа како тоа го објаснува и службеникот на ПОЦ“,
вели Герасимовски во објава на Фејсбук.
Побара од МВР да ги санкционира полициските службеници што не постапуваат при очигледни прекршоци.
„Недозволиво е полициски службеник да не сака да си ја врши својата работа и побара. Недозволива е селективноста при казнување на граѓаните“,
пишува градоначалникот на Центар.
Ја поздрави активноста на граѓаните што бараат санкционирање на сите оние што со своите возила ги блокираат улиците и велосипедските патеки во Центар.