Министерот за внатрешни работи не одговори конкретно на прашањата како полицискиот службеник и член на обезбедувањето на премиерот дошол до документите кои биле изнесувани од МВР, ниту, пак, за каков тип документи станува збор. Рече дека овие прашања се дел од истрагата која во моментов е во тек
Министерот за внатрешни работи Панче Тошковски денеска го коментираше случајот со полицискиот службеник и член на обезбедувањето на премиерот Христијан Мицкоски, кој е осомничен за оддавање службена тајна.
Тошковски не одговори конкретно на прашањата како полицаецот дошол до документите кои биле изнесувани од МВР, ниту, пак, за каков тип документи станува збор. Рече дека сите тие прашања се дел од истрагата која во моментов е во тек и дека потребните информации ќе бидат споделени со јавноста кога тоа ќе може да се направи.
„Одделот за внатрешна контрола во рамки на истрагата по добиени информации во рамки на Одделот известил надлежен јавен обвинител којшто се согласил и дал наредба да бидат преземени дејствијата истата вечер. По спроведување на акцијата извршени се и повеќе претреси кај полициски службеници исклучиво од страна на Одделот за внатрешна контрола, при што се пронајдени одредени докази во насока на стореното кривично дело“,
изјави Тошковски одговарајќи на новинарски прашања.
На прашањето дали се вознемирил или изненадил поради случајот, Тошковски рече дека сите во Министерството се вознемирени кога, како што рече, гледаат дека некој криминалец се прикривал со униформа.
Со овој случај, како што рече, МВР покажува дека неселективно се бори против криминалците во своите редови.
„Сакам да им порачам на сите оние недобронамернции и предавници на родот свој, имајќи ги предвид криминалците во МВР, дека неселективно и бескомпромисно ќе се бориме против истите. Македонските граѓани заслужуваат полиција која ќе ги штити, а не која ќе ги рекетира“,
додаде министерот за внатрешни работи.
Пред неколку дена беше уапсен полицискиот службеник и член на обезбедувањето на премиерот Христијан Мицкоски поради сомневања дека издавал службени тајни на трети лица. Станува збор за Ангел Сарамаков од Велес, кому му е одреден 30-дневен притвор и против кого ОЈО ГОКК отвори истрага.