Вечерва, како што рече адвокатот Еленко Миланов, му истекува времето од 24 часа на задржување, додавајќи дека до 14 часот во судот немало никакви известувања за некаква постапка против ексминистерот за економија Крешник Бектеши
Еленко Миланов, адвокатот на ексминистерот за економија Крешник Бектеши, кој вчеравечер беше повикан на распит во полициската станица „Карпош“ во врска со трагедијата во Кочани, прашан за кои околности Бектеши е повикан во полициска станица, вели дека засега нема правна квалификација.
Вели дека Бектеши сам се јавил во полициска станица кога бил повикан на информативен разговор, по што било побарано да биде задржан поради натамошни проверки.
Вечерва, како што рече адвокатот, му истекува времето од 24 часа на задржување, додавајќи дека до 14 часот во судот немало никакви известувања за некаква постапка против Бектеши.
Државниот јавен обвинител Љупчо Коцевски попладнево на прес-конференција беше прашан дали ќе се побара притвор за поранешниот министер за економија, Крешник Бектеши. Без да споменува име, Коцевски рече дека притвор ќе се бара за сите лица што се наведени и кои се сомничат за наведеното кривичното дело.
„Ќе се бара притвор за сите 14 лица“,
рече државниот јавен обвинител.