Таа апелира и до медиумите да не шират лажни информации како оние дека Андреј бил на домашно лекување, додека тој, како што посочува Ѓоргиеска, лежел мртов во болницата во Кочани
Наталија Ѓоргиеска, сопруга на трагично загинатиот пејач на бендот ДНК, Андреј Ѓоргиески, преку Фејсбук реагираше на наводите што на прес-конференција ги изнесе министерот за внатрешни работи Панче Тошковски, дека член на бендот ги донел пиротехничките средства во дискотеката што ја зафати страшниот пожар, а во кој животот го загубија 59 лица.
Таа апелира и до медиумите да не шират лажни информации како оние дека Андреј бил на домашно лекување, додека тој, како што посочува Ѓоргиеска, лежел мртов во болницата во Кочани.
„Во овој момент, кој е најтежок за нас, медиумите и државните институции, ме предизвикувате по првпат да се обратам до македонската јавност. Во текот на вчерашниот ден, по потрага на својот сопруг Андреја Ѓорѓиески, да го најдам во некоја од болниците, на домашна адреса нè посетила криминалистичката служба која без објаснување го барала мојот сопруг, во присуство на нашето дете. Таа служба ме побара телефонски во неколку наврати со најнехуман однос да дадам информација каде е мојот сопруг со цел да даде изјава за настанот, за што истото прашање го упатив кон нив. Од медиумите, кои пренесуваат лажни информации, дознале дека сопругот е на домашно лекување, додека тој лежи во болницата во Кочани, мртов. Ги замолувам сите јавни медиуми да не шират дезинформации на социјалните мрежи. Ги замолувам и јавните органи да си извршат детален увид за целиот трагичен настан. Во овој тежок момент за сите нас, јавно ги замолувам институциите и медиумите пред сè да ја почитуваат нашата приватност. Лажни објави дека мојот сопруг е на домашно лекување и дека пиротехниката е донесена од страна на бендот, ве молам, НЕ ШТИТЕТЕ НЕКОЈ ШТО ТРЕБА ДА Е ЗАД РЕШЕТКИ! Како сопруга и мајка на малолетно дете, покажете малку сочувство, а така и за поблиското семејство и пријателите“,
пишува Ѓоргиеска на Фејсбук.