Ваквите најави доаѓаат во пресрет на денешното патување на американскиот државен секретар Марко Рубио и советникот за национална безбедност Мајк Валц во Судиска Арабија, каде што утре треба да имаат средба со нивните украински колеги во врска со прашањето за ставање крај на војната меѓу Киев и Москва
Администрацијата на Трамп верува дека раководството на Украина е подготвено да оди чекор напред во однос на иницијативата на САД за прекин на огнот со Русија, изјавил висок претставник на американскиот Стејт департмент, објави Би-би-си.
Ваквите најави доаѓаат во пресрет на денешното патување на американскиот државен секретар Марко Рубио и советникот за национална безбедност Мајк Валц во Судиска Арабија, каде што утре треба да имаат средба со нивните украински колеги во врска со прашањето за ставање крај на војната меѓу Киев и Москва.
Американскиот претседател Доналд Трамп изминатите недели го засили притисокот врз својот украински колега Володимир Зеленски за прифаќање договор за мир со Москва, но без да даде експлицитно ветување дека евентуално таквиот договор ќе биде поддржан со безбедносни гаранции од САД, какви што бара Украина.
Двајцата претседатели, Трамп и Зеленски, пред десетина дена јавно се судрија во Белата куќа во врска со ова прашање, а американскиот претседател го обвини својот украинскиот колега дека не е подготвен да ги прекине борбите и оти не благодарен за помошта што Украина досега ја добила од САД.
За потсетување рускиот претседател Владимир Путин започна целосна инвазија на Украина во февруари 2022 година, а Москва во моментов контролира околу 20 проценти од украинската територија.
„Фактот што тие доаѓаат овде на високи нивоа е добар показател за нас дека сакаат да седнат на маса и дека се подготвени да продолжат напред“,
рекол претставникот на Стејт департментот, кој инсистирал на анонимност во пресрет на разговорите со украинската делегација во Џеда, Саудиска Арабија.
Во Саудиска Арабија се очекува да пристигне и украинскиот претседател, Зеленски, каде што е предвидено да се сретне со саудискиот престолонаследник Мохамед бин Салман, но не се очекува да биде дел од од разговорите со американската делегација.
Украинскиот тим ќе го претставува шефот на кабинет на Зеленски, Андриј Јермак, советникот за национална безбедност на земјата, како и министрите за надворешни работи и за одбрана.
„Се надеваме на резултати и на приближувањето на мирот и во континуираната поддршка“,
рече Зеленски во своето видеообараќање доцна во синоќа.
Зеленски е под силен притисок на САД да направи отстапки пред какви било мировни преговори, додека од друга страна украинскиот претседател се залага за цврсти безбедносни гаранции за Киев, нагласувајќи дека Путин ги прекршил претходните договори за прекин на огнот.
Кратко по кавгата во Белата куќа, Зеленски изрази жалење за инцидентот и се обиде да ги поправи односите со САД, кои се најголемиот снабдувач на земјата со воена опрема.
Специјалниот пратеник на американскиот претседател за Украина и Русија, Стив Виткоф, потоа соопшти дека Трамп добил писмо од Зеленски во кое имало „извинување“ и „чувство на благодарност“.
Виткоф рече дека во Саудиска Арабија американскиот тим сака да разговара за „рамка“ за мир во обид да се стави крај на руско-украинската војна.
Поради жестоката расправија меѓу Трамп и Зеленски не беше потпишан ниту договорот за ретки минерали што САД го бараат од Украина, а според најавите ќе биде и една од темите на кои ќе разговараат двете делегации во Џеда.
Имено, Украина им понуди на САД пристап до ресурсите со ретки минерали во замена за американски безбедносни гаранции при евентуален прекин на огнот со Русија.
Судирот во Белата куќа, исто така, резултираше и со прекин на сета воена помош од САД за Украина, како споделувањето на разузнавачки информации од страна на Вашингтон.
„Ние навистина сакаме да направиме сè што можеме за да ја натераме Украина да биде сериозна за да направи нешто“,
изјави вчера Трамп прашан дали размислува за укинување на суспендираната помош за Украина, без да наведе повеќе детали.
За потсетување на 18 февруари, пред да се случи кавгата во Овалната соба на Белата куќа, американскиот државен секретар и други високи претставници на администрацијата на Трамп одржаа разговори со рускиот министер за надворешни работи Сергеј Лавров во Саудиска Арабија, а кои дојдоа по телефонскиот разговор меѓу Трамп и Путин.